Prokuroria Themelore në Prishtinë në bashkëpunim me Policinë e Kosovës ka njoftuar se ka arrestuar dhjetë persona të dyshuar në lidhje me shpërthimin e ndodhur më 30 prill 2025 në parkingun e QKUK-së, ku një veturë e tipit Mercedes B-Class, pronë e drejtorit të QKUK-së, u përfshi nga shpërthimi.
Sipas njoftimit zyrtar, në mesin e të arrestuarve ka edhe shtetas të Republikës së Shqipërisë. Arrestimet janë bërë gjatë një aksioni policor në fshatin Rimanishtë të Komunës së Prishtinës, ku është kryer bastisje dhe kontroll.
Të arrestuarit dyshohen për kryerjen e dy veprave penale:
- Prodhimi dhe përpunimi i paautorizuar i narkotikëve, substancave psikotrope, analoge apo veglave, pajisjeve apo materialeve narkotike (neni 268 i Kodit Penal të Republikës së Kosovës)
- Mbajtja në pronësi, kontroll ose posedim të paautorizuar të armëve
Nga vendi i ngjarjes janë sekuestruar: një sasi e konsiderueshme e substancave psikotrope narkotike,
armë zjarri,si dhe prova të tjera materiale që do të shërbejnë në procedurën hetimore.
Prokuroria ka bërë të ditur se hetimet janë duke vazhduar me qëllim të zbardhjes së plotë të rastit.
