Real Madridi mbeti me mungesa të mëdha sezonin e kaluar pasi Eder Militao iu bashkua David Alabës në listën e të dëmtuarve, pas një dëmtimi të dytë radhazi të ligamentit.
Në fushë hyri Raul Asencio, duke nisur rrugëtimin e tij drejt zemrës së tifozëve në “Santiago Bernabeu”.
Me pak alternativa në qendër të mbrojtjes, Carlo Ancelotti filloi t’i jepte Asencios hapësira përkrah Antonio Rudiger. Me ndërhyrjet e forta dhe stilin agresiv, ai fitoi simpatinë e publikut.
Kjo gjithashtu i siguroi atij një kontratë të re deri në vitin 2029 dhe një vend në ekipin e parë. Por gjërat morën një kthesë më pas.
Edhe Xabi Alonso kishte pak opsione në fillim të Kupës së Botës për Klube, dhe Asencio luajti si titullar përkrah Dean Huijsen.
Në pjesën e parë të ndeshjes së parë, Asencio shkaktoi një penallti dhe u zëvendësua në pushim të ndeshjes.
Në ndeshjen e dytë, ai u përjashtua me karton të kuq pas vetëm shtatë minutash dhe më pas luajti vetëm edhe pesë minuta para gjysmëfinales kundër Paris Saint-Germain.
Më pas, ai shkroi një ndjesë në rrjetet sociale për tifozët madrilenë, duke kërkuar falje për paraqitjet e tij.
Sipas Sport, Alonso kishte dëshirë të sillte një tjetër qendërmbrojtës gjatë verës, ndoshta duke përshpejtuar transferimin e Ibrahima Konate.
Megjithatë, pasi Asencio nuk pranoi të largohej këtë verë dhe me David Alabën që gjithashtu vendosi të qëndrojë, nuk kishte hapësirë për një përforcim të ri në mbrojtje.
