Autore: Jona Kelmendi
Salla e Bibliotekës Kombëtare të Kosovës “Pjetër Bogdani” në Prishtinë sot u mbush përplot me dashamirë të komandant Sali Çekaj.
Kjo pasi që këtu u promovua libri “Sali Çekaj – Luftëtar i orëve të para të lirisë së Kosovës”.
Ky libër paraqet rrugëtimin e komandantit Çekaj si një nga nismëtarët e parë të organizimit të armatosur, që jetën ia kushtoi lirisë së Kosovës.
I pranishëm në sallë ishte edhe kryetari i Prishtinës, Përparim Rama, i cili dha një lajm për familjen Çekaj.
“Sot dua të përulem me respekt të veçantë para familjes sëkomandantit Çekaj. Sepse i jemi borxhlinj jovetëm atij,por edhe mbarë familjes, që e mbrujti, që e përkrahu, që ia dha Kosovës. Sot kam nderin që me tregu se një pjesë e projektit të madh që tani jemi duke e bë tek përmendorja e presidentit Rugova një pjesë e saj do ti kushtohet edhe komandantit Sali Çekaj. Sali Çekaj ra heroikisht më 19 prill 1999, në betejën e Koshares. Ai nuk e kërkoi lavdinë, nuk e kërkoi titullin e heroit. Ai deshi vetëm që Kosova të ishte e lire”, u shpreh Rama.
Gjithashtu edhe kryetari i Shoqatës së Intelektualëve shqiptarë në diasporë “Trojet e Arbrit”, Nue Oroshi tha se e vërteta për jetën dhe veprën e Çekajt tashmë ka dalë në dritë.
“Duhet të ruhemi për mallkimin e historisë, dhe gjithmonë duhet të jemi të kujdesshëm dhe ta themi të vërtetën, është si një shtizë shpuese por ajo do të dalë në dritë e në dritë dolën edhe rrëfimet e bashkëluftëtarëve. Të gjithë u bëmë bashkë për ta nxjerrë në dritën e diellit për luftëtarin dhe heroin Sali Çekaj. Heroin të cilin të shumtën e kohës lindjen e diellit e priti nëpër Alpet Shqiptare edhe pse shpeshherë të mbushura me borë por kurr nuk u ligështua dhe kurrë nuk e lëshoi pushkën nga dora”, tha ai.
E në anën tjetër edhe profesori Milazim Maraj theksoi se heronjtë e përcaktojnë vetë pavdekësinë e tyre dhe për ta duhet folur me kujdes.
“Pavdekësinë heronjtë e përcaktojnë vetë por për angazhimin e tyre të dokumentuar duhet të flasim me kujdesë dhe për secilen fazë të zhvillimit të ngjarjes veq e veq. Duke pasur parasysh ngjarjet të cilat kemi parë apo dëgjuar apo imagjinojmë të ken ndodhur, këto figura nuk kan nevojë për mbrojtës e as për mbrojtje të kalibrit apo të këtij kuptimi”,tha ai.
Në fund të promovimit të librit, vajza e komandantit Sali Çekaj, e pranishme në këtë ngjarje, falënderoi në emër të familjes të gjithë ata që kontribuan në botimin e librit.
Çekaj ra heroikisht në betejën e Koshares më 19 prill 1999.
