Kryetari i Aleancës për Ardhmërinë e Kosovës, Ramush Haradinaj, ka kujtuar sot 35-vjetorin e shpalljes së Kushtetutës së Kaçanikut, duke e cilësuar atë si aktin historik që i hapi rrugë shkëputjes së Kosovës nga Serbia dhe Jugosllavia e atëhershme.
“Më 7 shtator 1990, në Kaçanik, delegatët e Kuvendit të Kosovës aprovuan Kushtetutën e Kosovës, aktin historik që vendosi themelet e shkëputjes së Kosovës nga Serbia dhe Jugosllavia e atëhershme, të njohur si Kushtetuta e Kaçanikut. Me nderimin më të lartë kujtojmë delegatët e asaj kohe, të cilët në rrethana të vështira, me guxim dhe vizion, përfaqësuan aspiratën e kahmotshme të popullit shqiptar për liri dhe vendosën themelet e shtetësisë e pavarësisë së Kosovës. Mirënjohje e përjetshme për kontributin e tyre të pamohueshëm!”, ka shkruar Haradinaj në Facebook.
Ai tha se kjo ditë mbetet një nga ngjarjet më të rëndësishme të historisë moderne të Kosovës, duke e quajtur Kushtetutën e Kaçanikut akt të lirisë dhe vizionit politik.
