Mediumi zviceran, 20min.ch ka bërë një artikull rreth futbollistëve të Kosovës, në prag të ndeshjes Zvicër-Kosovë, e vlefshme për kualifikim në Kampionatin Botëror.
Ky medium ka renditur katër futbollistë kosovarë, prej të cilëve duhet të ketë kujdes Zvicra.
Leon Avdullahu
Të premten mbrëma, në ndeshjen hapëse të Zvicrës në kualifikimet për Botëror kundër Kosovës, shumë sy në “St. Jakob-Park”, i mbushur deri në fund, do të jenë të drejtuar te Leon Avdullahu. Heroi i titullit me FC Basel dhe tashmë lojtari i ri i Hoffenheim-it vendosi para këtij grumbullimi që në të ardhmen të luajë për Kosovën e jo për Zvicrën. Në stadiumin e tij të vjetër, “Joggeli”, mesfushori shpeshherë i thjeshtë, por gjithmonë i besueshëm, mund të debutojë në arenën ndërkombëtare.
Fisnik Asllani
Ashtu si Avdullahu, edhe Fisnik Asllani luan për TSG Hoffenheim në Bundesligë. I lindur në Berlin dhe i transferuar si junior në akademinë e Hoffenheim-it, sulmuesi i qendrës 23-vjeçar pati shpërthimin e madh vetëm sezonin e kaluar me surprizën SV Elversberg në Bundesliga 2, ku shënoi 18 gola. Tani Asllani dëshiron të përforcohet te Hoffenheim-i në elitën e futbollit gjerman dhe të shkëlqejë edhe me kombëtaren.
Vedat Muriqi
“Makthi më i madh i Real Madridit”, shkroi dikur një medium për Vedat Muriqin, pasi ai shënoi në tri ndeshje radhazi kundër madrilenëve me Mallorcën. Edhe te kombëtarja, statistikat e sulmuesit 1.94 metra janë mbresëlënëse: në 56 ndeshje me Kosovën ka realizuar 28 gola. Për krahasim: sulmuesi i Zvicrës, Breel Embolo, në 77 paraqitje ka shënuar vetëm 18 gola.
Amir Rrahmani
Paksa më larg vëmendjes mediatike, por tepër i rëndësishëm, është kapiteni i mbrojtjes, Amir Rrahmani. Mbrojtësi i qendrës 31-vjeçar ka qenë titullar i padiskutueshëm i Napolit dhe ka pasur rol vendimtar në të dy titujt e fundit të kampionit të klubit nga Italia (2023 dhe 2025). Te kombëtarja, ai mban të fortë prapavijën përkrah shokëve më pak të dekoruar.
