Rruga drejt FIBA EuroBasket 2029 do të fillojë në nëntor. Të hënën më 8 shtator nga ora 10:30 do të zhvillohet shorti i Raundit të Parë të Parakualifikimeve të FIBA EuroBasket 2029 në kryeqytetin letonez, Riga.
10 kombëtare janë të ndara në katër vazo nga FIBA sipas renditjes botërore. Një grup do të përbëhet nga katër shtete dhe dy grupet e tjera do të përbëhen nga tre shtete.
Kosova është në vazon e dytë dhe më 8 shtator do të mësojë kundërshtarët.
Raundi i Parë i Parakualifikimeve do të luhet në tre dritare: nëntor 2025, shkurt 2026 dhe qershor-korrik 2026.
Katër kombëtare – tre fitueset e grupeve dhe vendi i dytë më i mirë do të kualifikohen në Raundin e Dytë.
Kosova merr pjesë rregullisht në fazën e fundit të kualifikimeve për kampionate evropiane e botërore, por që gjasat për të kaluar këtë fazë janë minimale.
Në parakualifkimet e fundit për Botërorin e vitit 2027, “Dardanët” ishin pjesë e grupit A, parakualifikues të Evropës, me Zvicrën, Irlandën e Azerbajxhanin, duke përfunduar në pozitën e tretë.
Kosova kishte vetëm 2 fitore, ndaj Irlandës dhe e Azerbajxhanit, derisa pësoj katër humbje në gjashtë duele.
