Në këtë takim u diskutua për reformat e nisura nga ministria e Drejtësisë.
Në njoftim thuhet se ministrja Haxhiu, njoftoi komisioneren Mijatoviç për punën që është bërë deri tani në kuadër të reformës në drejtësi.
“Ministrja Haxhiu e njoftoi komisioneren Mijatoviç për punën që është bërë deri tani në kuadër të reformës në drejtësi si dhe me politikat që avancojnë të drejtat e njeriut si dhe veprimet që janë ndërmarrë në adresimin institucional të dhunës në familje dhe krimet e kryera gjatë luftës në Kosovë si dhe punën gjithëpërfshirëse në kuadër të strategjisë për drejtësi tranzicionale”, thuhet në njoftimin e MD-së.
Tutje bëhet e ditur se Haxhiu ka folur për Kodin Civil si dokument i rëndësishëm për avansimin e të drejtave të njeriut dhe rëndësinë që ka për vendin dhe qytetarët anëtarësimi i Kosovës në Këshillin e Evropës.
“Ministrja Haxhiu përmendi edhe Kodin Civil si një dokument të rëndësishëm në avansimin e të drejtave të njeriut si dhe tregoi rëndësinë që ka për vendin dhe qytetarët anëtarësimi i Kosovës në Këshillin e Evropës, me ç’rast përveç tjerash kjo do të ndikonte edhe në përmirësimin e funksionimit të sistemit të drejtësisë, duke krijuar kushte më të përshtatshme për të implementuar praktikat më të mira rrjedhimisht ngritjen e standardeve të respektimit të të drejtave të njeriut”, thuhet tutje.
