Në kuadër të punimeve të Forumit Strategjik të Bledit, zëvendëskryeministrja dhe ministrja në detyrë e Punëve të Jashtme dhe Diasporës, Donika Gërvalla, zhvilloi një takim me zëvendëskryeministren dhe ministren e Punëve të Jashtme dhe Evropiane të Sllovenisë, Tanja Fajon.
Gjatë takimit u diskutua për thellimin e bashkëpunimit ekonomik dhe nxitjen e lidhjeve ndërmjet bizneseve të të dyja vendeve.
Në njoftim thuhet se çështje me rëndësi të veçantë ishte finalizimi i procesit të njohjes së patentë-shoferëve të Kosovës në Slloveni.
Sipas njoftimit, Gërvalla shprehu falënderimet e saj për mbështetjen e vazhdueshme të Sllovenisë ndaj Kosovës në procesin e integrimit euroatlantik.
“Mbështetja e palëkundur e Sllovenisë për integrimin euroatlantik të Kosovës riafirmon rolin e saj si një aleate dhe partnere strategjike e vendit tonë”, theksoi Gërvalla.
