Autore: Adea Mustafaj
Fakulteti Filologjik hapi dyert e sallës “Idriz Ajeti” për përkujtimoren e profesor Zef Ndojës.
Në ekran shfaqeshin fotografitë e tij, derisa kolegët dhe familjarët zinin vendet e tyre.
Me një minutë heshtje nisi nderimi për jetën dhe veprën e tij.
Ndër të parët që mori fjalën ishte Xhavit Ramadani, asistent dhe bashkëpunëtor i profesorit Ndoja, i cili shprehet se misioni i profesorit është përmbushur.
“Me krenari dhe mirënjohje i drejtohem profesor Zefit, duke uruar që është duke na parë nga lart. Theksoj se misioni i tij është përmbushur plotësisht, duke lënë pas një trashëgimi të çmuar në arsim, shkencë dhe industrinë ushqimore. Të nderuar të pranishëm, me profesor Zefin personalisht më lidhin tre dekada bashkëpunim. Ky rrugëtim për mua mbetet shumë i çmuar. Jam krenar dhe thellësisht i lumtur që pata mundësinë ta njoh nga afër dhe të mësoj prej tij”, tha Xhavit Ramadani, asistent dhe bashkpunues i profesrit Ndoja
Ish-kolegu i profesorit, Shukri Fetau, kujtoi momentin kur u mor iniciativa për të themeluar Departamentin e Teknologjisë Ushqimore me Bioteknologji.
“Në vitin 2007 unë isha në pozitën e dekanit, ai ishte shef i departamentit. Ende nuk ishte departament. E morëm iniciativën për të themeluar Departamentin e Teknologjisë Ushqimore me Bioteknologji, duke na ndihmuar Hochschule e Gjermanisë, ajo e Italisë dhe universiteti i Hungarisë. Ai kishte dozën e bindjes se do të kemi sukses. Unë e kam përkrahur deri në fund, si në pozitën e dekanit ashtu edhe si koleg. Zef Ndoja thoshte: ‘Përpara, mos shiko mbrapa.’ Dhe më në fund e finalizuam atë”, tha Fetahu.
Në përkujtimore foli edhe djali i profesorit, i cili ndau një kujtim nga vitet e ’90, kur babai i tij refuzoi ofertat për punë jashtë vendit.
“Edhe pse të gjithë e dinë që në vitet e ’90 jeta nuk ishte aspak e lehtë për punëtorët e arsimit, babai pati dy raste serioze për ta lënë Kosovën dhe për të punuar në Evropë. Por fjalët e tij ishin: ‘Nuk mundem që t’ua kthej shpinën studentëve dhe kolegëve të mi në këtë kohë”, tha ai.
Kujtimin e saj e ndau edhe Alltane Kryeziu, prodekane në Fakultetin e Bujqësisë, e cila tregoi një mësim të profesorit që e ndjek edhe sot.
“Unë profesorin e kam pasur edhe në komision, në mbrojtje të temës së diplomës. Dhe diçka që e ka thënë më kujtohet si sot, edhe pse kanë kaluar 40 vite. Më ka thënë që ti duhet t’i besosh së pari vetvetes, madje edhe të tjerëve në aspektin e hulumtimeve shkencore. Kështu që mbaje mend, e ka përkufizuar: ‘Mbaje mend mirë që punën që e ke bërë vetë, askush nuk e di më mirë se ti”, u shpreh ajo.
Profesori Zef Ndoja njihet si nismëtar për themelimin e Departamentit të Teknologjisë Ushqimore dhe Bioteknologjisë.
Ai ndërroi jetë më 19 gusht të këtij viti.
