Zëdhënësi i PK-së për rajonin e Prishtinës, Agron Borovci ka treguar për teve1.info se gjatë orës 04:30 është ndaluar një veturë me tre persona – dy nga të cilët shtetas të huaj.
“Sot rreth orës 04:30, njësia patrulluese policore përgjatë kryerjes së detyrave të zakonshme në zonën qendër, ka ndaluar një veturë me tre persona, dy nga të cilët shtetas të huaj. Ndërkohë që janë kryer veprimet e nevojshme verifikuese nga ana e policisë, të njëjtit janë lënë të lirë për të vazhduar më tej”, thotë ai.
Sipas tij, përveç liturgjisë së Kishës Ortodokse që po vazhdon të mbahet në Bardhosh të Prishtinës, nuk është paralajmëruar ndonjë aktivitet tjetër.
“Ndërlidhur me pretendimet për ndonjë aktivitet fetar, përveç liturgjisë së Kishës Ortodokse që po vazhdon të mbahet në fshatin Bardhosh të komunës së Prishtinës nuk kemi ndonjë aktivitet tjetër të paralajmëruar. Ky aktivitet ka qenë i paralajmëruar dhe për aq sa i takon policia po monitoron ngjarjen për të lehtësuar rrjedhën normale të tij”, shtoi ai.
Ndryshe, Famulltari i Kishës Ortodokse Serbe në Kosovë, Stanisha Arsiq ka pretenduar se Policia e Kosovës nuk i ka lejuar të enjten që të kryejnë liturgjinë në Kishën e Shpëtimtarit në kampusin e Universitetit të Prishtinës.
Ai ka thënë për “Kosovo Online” se Policia ua ndaloi në mëngjesin e enjtes që të kryejnë ritet në nder të Festës së Shpëtimtarit.
Sipas tij, tetë zyrtarë policorë ua kanë ndaluar atyre hyrjen në këtë objekt dhe pasi u kanë marrë dokumentet, janë detyruar të kthehen prapa.
Ndryshe, vitin e kaluar në kishën në kampusin e UP-së u mbajt liturgjia e parë që nga viti 1998. Pati bërë bujë. Nga Qeveria e Kosovës ishte konsideruar provokim dhe ishte thënë se aktiviteti përbën shkelje të rregullave të sigurisë publike.
Kjo Kishë në kampusin e Universitetit të Prishtinës kishte nisur të ndërtohej në vitin 1992, në kohën e regjimit të Slobodan Milosheviqit, por deri në përfundim të luftës në Kosovë nuk arriti
të përfundohej.
Pas luftës Kisha Ortodokse Serbe ka tentuar në disa raste ta funksionalizojë, së fundmi më 2016, por s’qe lejuar nga Komuna e Prishtinës, pasi u kërkua dokumentacion për objektin.
