Rreshta të tërë çantash ishin vendosur këtë të premte në sallën “1 Tetori” në Prishtinë.
Gati për t’u shpërndarë te fëmijët në nevojë, 498 çanta nga organizata “Islamic Relief Kosova” ishin mbushur me mjete shkollore për nxënësit nga Prishtina, Fushë Kosova, Lipjani, Obiliqi dhe Podujeva.
“Për këtë fillimvit shkollor, jemi duke shpërndarë afërsisht 1500 çanta dhe materiale të nevojshme për fëmijët nga klasa e parë deri në klasën e dhjetë, në gjitha komunat e territorit të Kosovës”, tregoi asistentja e projekteve, Diella Kastrati.
Duke iu drejtuar prindërve dhe stafit, zëvendësdrejtoresha e kësaj organizate foli për rëndësinë e mbështetjes së fëmijëve.
“Për ne është me rëndësi që ju si prind t’i kushtoni rëndësi fëmijëve tuaj çdo vit, edhe në emër të stafit i cili është i palodhshëm, në emër të donatorëve të cilët i falënderojmë shumë që po bëjnë të mundur çdo vit të realizojmë një projekt të tillë që është shumë i rendësishëm, pasiqë secili prej nesh e dimë që edukimi është baza kryesore për gjeneratat e reja”, tha zëvendësdrejtoresha, Albulena Gashi-Hajrullahu.
Një mesazh për fëmijët pati koordinatorja për ngritjen e fondeve, Rezarta Krasniqi.
“Fëmijë të dashur, edhe une para disa viteve kam qenë njejtë sikur ju edhe e di shumë mirë se si ndiheni mirëpo kisha dashtë me ja u jep një këshillë se asnjë sprovë që vjen prej Zoti nuk duhet me iu ndalë ju duhet të ndjekni andrrat e juve, edhe është me rëndësi për juve që të punësoheni e të shkolloheni”, tha ajo.
E në anën tjetër ,Vlora Mustafa, zyrtare për mirëqenien e fëmijëve jetimë e vuri theksin te mesazhi i ngrohtësisë dhe besimit në të ardhmen.
“Është një shpërndarje jo aq shumë ndihmë praktike, më shumë është një mesazh kujdesi dashurie edhe besimi në të ardhmen e juve e të gjithë fëmijëve të mrekullueshëm. Falënderoj të gjithë ata që e kanë bërë të mundur këtë nismë duke fillu prej kolegëve tanë e donatorëve tanë posaçërisht juve nëna e fëmijë të cilëve ju uroj një vit të ri shkollor”.
Në këtë ditë, nënat nuk e fshehën emocionin e tyre.
“Edhe pse kam emocione, jam nëna e Reas ju falënderoj shumë organizatës së Islamikut, donatorëve, faleminderit shumë të cilët i ndihmojnë shumë fëmijët tanë për shkollimin, për jetën, pak me na e lehtësu”, u shpreh nëna përfituese, Nurie Ibishi.
Krejt në fund, një nxënëse recitoi një poezi.
Ky aktivitet ka filluar të zhvillohet për herë të parë në vitin 2014 dhe që nga atëherë, kjo organizatë u qëndron pranë familjeve në nevojë.
Kronikë e realizuar nga gazetarja, Jona Kelmendi.
