Nëna e Elvis Hasanit, një fëmijë 10-vjeçar nga komuniteti ashkali, i cili më 10 gusht u godit nga një veturë në Bresje të Fushë Kosovës, ka bërë apel për ndihmë për sigurimin e medikamenteve të nevojshme për shërimin e djalit të saj.
Për televizionin Tëvë1, ajo ka treguar vështirësitë me të cilat po përballet familja:
“Krejt infuzionat po duhet me i ble vet pare, s’po kem veç qka po na ndihmojnë kështu.”
“Policia na kanë thënë që e kanë nxon fajtorin dhe na kanë thonë që do të vijmë aty ditën mas aksidentit, po nuk kanë ardhë pra do të thotë janë bërë 3 javë prej aksidentit dhe s’ka ardh kush me pa, edhe ata po na anashkalojnë se jemi shkali.”
Tutje, një qytetare tjetër, Dafina Krasniqi, në rrjetin social Facebook ka ngritur alarmin për gjendjen e rëndë shëndetësore të Elvis Hasanit, duke kritikuar mungesën e vëmendjes nga institucionet përgjegjëse:
“Para rreth një jave e kam nda në mediat sociale personale rastin e Elvis Hasanit, fëmijës 10-vjeçar, Ashkali, i goditur nga një veturë më 10 gusht në Bresje të Fushë Kosovës. Këtë lajm ASNJËHERË s’e kam pa në ndonjë platformë të lajmeve në Kosovë… Familja e Elvisit është në spitalin pediatrik prej 18 ditësh, me informata të kufizuara mbi gjendjen dhe prospektin e shërimit, ndërsa Elvisi i vogël mbetet në gjendje shumë të rëndë, me dëmtim të trurit dhe pa mundësi të rikthejë vetëdijen e lëvizjen në anën e djathtë të trupit.”
Krasniqi ka shtuar se familja nuk ka marrë asnjë informacion për procedurat ndaj shoferit që shkaktoi aksidentin:
“Familja poashtu nuk ka marr ASNJE informate përditësuese për procesin e hetimit lidhur me personin që e ka godit dhe është largu pa i ofru asnje ndihme Elvisit.”
Ajo ka bërë gjithashtu apel për trajtim të dinjitetshëm dhe respekt për viktimat e aksidenteve:
“Mirëpo mbetem dëshmitare e dëshpëruar për dështimet e vazhdueshme për të treguar respekt e ndjeshmëri për trajtim të dinjitetshëm të aksidentit dhe shërimit të Elvisit, e shumë fëmijëve të tjerë – që janë të drejta të tyre bazike të pamohueshme dhe duhet të realizohen!!”
Familja dhe qytetarët bëjnë thirrje për mbështetje financiare dhe mjekësore për Elvis Hasanin, i cili vazhdon të qëndrojë në gjendje të rëndë shëndetësore në spital.
