Profesori universitar, Nexhmedin Spahiu ka akuzuar paritë opozitare të legjislaturës së kaluar se tani po bllokojnë votimin e nënkryetarit nga komuniteti serb.
Ai ka thënë se nëse Vetëvendosje akuzohej për bllokim të zgjedhjes së kryetarit të Kuvendit, ish-opozita janë bllokuese të nënkryetarit nga komuniteti serb.
Spahiu në emisionin “InfoNata” në Tëvë1 ka thënë se ato do të mund ta votonin Nenad Rashiqin dhe nëse ai kontestohet, për këtë do të vendoste Gjykata Kushtetuese.
“Për dallim prej zgjedhjes së kryetarit të Kuvendit, ku si bllokues shihej Albin Kurti, Vetëvendosja në rastin e zgjedhjes së nënkryetarit po shihet se bllokues janë partitë tjera. Ato komod mund ta votonin Rashiqin, nuk do të kishin asnjë arsye edhe nëse ajo është diçka ligjore, Gjykata Kushtetuese nga ankesa e Listës Serbe do të mund ta ndryshonte këtë. Por, kjo si duket nuk i leverdisë partive opozitare, prandaj ato janë duke e bllokuar”, ka thënë Spahiu.
Të enjten ka dështuar konstituimi i Kuvendit, pasi nuk është votuar nënkryetari i Kuvendit nga komuniteti serb.
Asnjë nga deputetët e Listës Serbe, por edhe i vetpropozuari ,Nenad Rashiq nuk morën votat e mjaftueshme.
