Kryeministrja e Danimarkës, Mette Frederiksen, ka kërkuar falje për herë të parë për skandalin e kontracepsionit të detyruar, në të cilin mijëra vajzave dhe grave nga Grenlanda iu vendosën spirale kontraceptive pa lejen ose dijeninë e tyre.
Duke e përshkruar atë si “diskriminim sistemik” kundër grave dhe vajzave nga sistemi danez i kujdesit shëndetësor, Frederiksen tha se për shkak se ishin nga Grenlanda, ato i nënshtroheshin “dëmtimit fizik dhe psikologjik”.
Disa nga gratë ishin vetëm 12 vjeç kur thonë se u është vendosur një pajisje intrauterine (IUD) nga mjekët danezë në një përpjekje për të zvogëluar popullsinë e Grenlandës, e cila deri në vitin 1953 ishte një koloni daneze dhe fitoi kontrollin e sistemit të saj të kujdesit shëndetësor vetëm në vitin 1992, shkruan The Guardian.
Besohet se 4,500 gra dhe vajza u prekën midis viteve 1966 dhe 1970. Ish-kryeministri i Grenlandës, Múte B Egede, e ka përshkruar skandalin e DIU-së si një “gjenocid”.
Kërkimi i ndjesës nga Danimarka për rastet deri në vitin 1992 – i bërë në një deklaratë të përbashkët me kryeministrin e Grenlandës, Jens-Frederik Nielsen, i cili kërkoi ndjesë për rastet pas asaj date – vjen përpara publikimit të një hetimi të shumëpritur për rastin e DIU-së, i cili pritet të publikohet në shtator.
Veçmas, 143 gra nga Grenlanda vitin e kaluar paditën shtetin danez për 43 milionë korona daneze, duke pretenduar se u ishte vendosur spiralja kontraceptive pa pëlqimin ose dijeninë e tyre, në atë që ato e përshkruajnë si shkelje të të drejtave të tyre njerëzore.
