Mijëra qytetarë dolën në rrugë që nga orët e para të mëngjesit të së martës, duke bllokuar autostrada dhe duke protestuar përpara shtëpive të ministrave, si pjesë e një dite të organizuar veprimi për të kërkuar që qeveria të arrijë një marrëveshje për lirimin e 50 pengjeve dhe përfundimin e luftës.
Kjo ditë e aksionit, e thirrur nga Forumi i Pengjeve dhe Familjeve të Zhdukura, nisi në orën 6:29 të mëngjesit, me protestues që valëvitën flamuj izraelitë jashtë Ambasadës Amerikane në Tel Aviv.
Në orën 7:00, protestuesit vazhduan me bllokimin e disa kryqëzimeve kryesore në mbarë vendin, duke ndërprerë trafikun dhe duke mbajtur pankarta që kërkonin kthimin e të gjithë pengjeve.
Në disa raste, protestuesit i vunë zjarrin gomave në autostrada, sipas raportimit të The Times of Israel.
Rrugët kryesore, përfshirë Autostradën Ayalon në Tel Aviv, Rrugën 1 midis Tel Avivit dhe Jerusalemit, si dhe Rrugën 2 përgjatë bregdetit, u bllokuan për disa orë, duke shkaktuar kaos në qarkullim, përpara se policia të njoftonte se trafiku ishte normalizuar.
Policia theksoi se “liria e protestës dhe e shprehjes nuk është liri për të dëmtuar lirinë e lëvizjes së shumë të tjerëve.”
Ndërkohë, familjarët e pengjeve u mblodhën në Sheshin e Pengjeve në Tel Aviv për të mbajtur një deklaratë për shtyp.
Einav Zangauker, nëna e pengut Matan Zangauker, deklaroi se pas 690 ditësh lufte “pa një qëllim të qartë”, është bërë e qartë se kryeministri Benjamin Netanyahu “ka frikë nga një gjë – presioni publik.”
Javën e kaluar, Hamasi njoftoi se kishte rënë dakord për një marrëveshje që do të sillte lirimin e gjysmës së pengjeve, ndërkohë që do të nisnin negociatat për t’i dhënë fund konfliktit dhe për lirimin e pjesës tjetër.
Por, Netanyahu është shprehur se Izraeli do të pranojë vetëm një marrëveshje që parashikon lirimin e menjëhershëm të të gjithë pengjeve dhe ndërkohë po avancon me planet për një ofensivë ushtarake që synon pushtimin e Qytetit të Gazës.
