Hisen Berisha nga PDK-ja ka kritikuar Lëvizjen Vetëvendosje për propozimet e deritashme për kryetar të Kuvendit, duke thënë se ato janë tallje me institucionet dhe opozitën.
“Duke mos e konstituuar Kuvendin e Kosovës i bie që po tallesh me vendin, dhe duke propozuar kandidat të tillë po i tallë institucionet e Kosovës dhe opozitën, të cilën po mundohet ta përdorë si dekor, por e ka gabim”, ka thënë Berisha.
Ai ka përmendur edhe kandidaturat e Vetëvendosjes, përfshirë ministren në detyrë, Albulena Haxhiun dhe deputeten Donika Gërvallen, për të cilën tha se nuk ka integritet për të dalë dhe kërkuar votë.
“Pas Haxhiut, u propozua zonja Schwarz, të cilës nuk mund t’ia them emrin e babës, sepse sot e pash që… është pak frikë me fol pse, pasi që u zotua që ‘ai që më akuzon në media se kam bashkëpunuar për Gjykatën Speciale në Hagë me prokurorë që kanë mbledh të dhëna – do ta padis’. Atëherë unë i them që urdhëro emisionin me Pandurin, ku deklaron personalisht vetë se ka dorëzuar dosje dhe nga 2018-ta e thoshte se nuk i kontrollonte fjalët se çfarë po thoshte – se para 2018 ka punuar në mënyrë intensive”, deklaroi Berisha në emisionin “Info Nata” në Tëvë1.
Ai tha se Gërvalla ka përdhosur dhe turpëruar idealet e luftëtarëve të UÇK-së, përfshirë edhe veprat e babait të saj, Jusuf Gërvalla.
“Çfarë integriteti ka ajo me dalë dhe me kërkua votë nga luftëtarët ose partive që në ADN-në e tyre kanë UÇK-në dhe kanë në prapavijë krejt historinë e krijimit të shtetit dhe realizimit të idealeve edhe të babës së saj që kjo i ka përdhosë dhe i ka turpëruar si emër dhe si vepër”, tha ai. /teve1.info/
