Një zyrtar i lartë i Gardës Revolucionare Islamike paralajmëroi të dielën se një përplasje e re ushtarake me Izraelin apo Shtetet e Bashkuara mund të shpërthejë në çdo moment.
“Nuk jemi në armëpushim, jemi në një fazë lufte. Asnjë protokoll, rregullore apo marrëveshje nuk është shkruar midis nesh dhe SHBA-së apo Izraelit,” deklaroi Yahya Rahim Safavi, këshilltar i lartë ushtarak i Udhëheqësit Suprem të Iranit, Ali Khamenei, në një intervistë për mediat iraniane.
“Mendoj se mund të ndodhë një luftë tjetër dhe pas kësaj, mund të mos ketë më luftëra”, shtoi ai, sipas një përkthimi të publikuar nga Iran International, i cituar nga The Times of Israel.
Safavi vazhdoi duke theksuar nevojën për fuqizim të gjithanshëm: “Amerikanët dhe sionistët thonë se krijojnë paqe përmes fuqisë; prandaj, edhe Irani duhet të bëhet i fortë, sepse në sistemin natyror, të dobëtit shkelen.”
Ai shtoi: “Ne duhet të forcojmë strategjinë tonë diplomatike, mediatike, të raketave, të dronëve dhe të ofensivës kibernetike. Ne, ushtria, bëjmë planifikim skenarësh, shohim rastin më të keq dhe përgatisim një plan për të.”
Pas shpalljes së një fitoreje nga Izraeli në muajin korrik, Kryeministri Benjamin Netanyahu paralajmëroi se do të rifillonte goditjet ndaj Iranit nëse ky i fundit vazhdonte me pasurimin e uraniumit.
“Nëse dikush në Iran përpiqet të rindërtojë [programin bërthamor], ne do të veprojmë me të njëjtën vendosmëri, me të njëjtin intensitet, për të penguar çdo përpjekje,” deklaroi ai.
Në fund të korrikut, Ministri i Jashtëm iranian Abbas Araghchi paralajmëroi për një përgjigje edhe më të ashpër nëse SHBA apo Izraeli sulmojnë përsëri: “Nëse ka shqetësime në lidhje me devijimin e mundshëm të programit tonë bërthamor në qëllime jo-paqësore, ‘opsioni ushtarak’ doli i paaftë — por një zgjidhje e negociuar mund të funksionojë,” u shpreh Araghchi gjatë samitit të BRICS në Rio de Janeiro më 6 korrik 2025.
Konflikti 12-ditor midis Izraelit dhe Iranit filloi më 13 qershor me një sulm të papritur izraelit./teve1
