Semaforët të vetmit në qytetin e Pejës qëndrojnë të fikur, prej disa vite tashmë.
Për qytetarët, kjo situatë është shqetësuese.
Andaj bëjnë apel që rregullimi i tyre të jetë prioritet për komunarët.
“Po po e shihni edhe vetë, kur nuk punojnë semaforët çfarë tollovi është. Semaforët në Pejë, kanë punu vetëm një muaj ditë edhe ma s’ka semaforë. I kemi pas edha atje te rrethi, te gjykata, atje janë prishur. Qytet pa semaforë në Kosovë vetëm Peja është”, tha qytetari Avdullah Lloshi.
“Normal që është rrezik përderisa nuk janë në funksion semaforët…. Është gjëja e parë që duhet me u rregullua për këtë vend”, tha qytetarja Albulena Zeka.
Mirëpo, sipas Komunës zgjidhje më adekuate për komunikacionin e Pejës janë rreth- rrotullimet sesa semaforët.
Andaj ata presin të ndërtojnë tre të tilla, te Spitali i Pejës, te shtëpia e mallrave dhe te furra “Ahmeti”.
“Rrethi i fundit që është punu edhe është lëshu në funksion e kemi pa të gjithë edhe jemi dëshmitar që ka fillua me funksionu mjaft mirë edhe e ka lirua shumë atë pjesë të qytetit dhe komunikacionin në atë pjesë. Do të thotë rrethretullimet përshtatën rrugëve të qytetit të Pejës…. Na mendojmë që me ndërtimin e këtyre tre rrathëve të rijnë apo katër do ta bëjmë zgjidhjen e komunikacionit në nyjet të rrugëve”, tha drejtori i Shërbimeve Publike në Pejë, Agron Nikçi.
Megjithëkëtë opozita në Pejë nuk po i sheh si zgjidhje rreth rrotullimet.
“Ne nuk mendojmë që vendosja e rreth rrotullimeve çdo 100 metra e zgjidh këtë problem të komunikacionit, por e zgjidhin hapja e rrugëve të reja si dhe hapja e mundësive të ndonjë nënkalimi për të kaluar veturat për të mos penguar mrenda për mrenda komunikacionit dhe urbanizmin”, tha Berat Ganiqi.
Megjithatë, nga Komuna thonë se kanë edhe plane tjera që do të ndihmojnë në shkarkimin e komunikacionit.
Ata parashohin bërjen e pesë deri në gjashtë bypass-eve, të cilat do të nisin këtë vit dhe do të vazhdojnë edhe vitin e ardhshëm.
Kronikë e realizuar nga gazetarja, Adea Mustafaj.
