Kryetari aktual i Drenasit, Ramiz Lladrovci, ka folur për presionet që ka marrë nga PDK-ja për të lënë pozitën e kryetarit, në emisionin “Mesditë” në Tëvë1.
Ai ka treguar se disa anëtarë të PDK-së nuk e duan në kryesi, duke e ndikuar edhe qëndrimin e kryetarit të partisë, Memli Krasniqi.
“Unë nuk besoj që PDK-së i pengon em pas një kryetar shembull, por një grup i caktuar të kryesisë në PDK nuk e dojnë që punojnë me duart të pastërta”, ka thënë Lladrovci.
Ai shtoi se nuk është çështje personale vetëm me kryesinë, por me strukturat më të gjera të partisë.
“Mu ka disa që nuk më dojën në PDK, por po i bie që nuk më do kryetari i Partisë Demokratike, sepse unë kam thënë edhe në emisione të tjera: bonu lider, dil e thuaj, ‘nuk e dua më Lladrovcin në qeverisje’, e jo të shpërndaj përgjegjësinë tek 43 anëtarët e PDK-së”, ka shtuar ai.
Lladrovci gjithashtu ka përshkruar kërkesën direkte nga Memli Krasniqi:
“Kryetari u dashtë me ardh edhe me më thanë a po vazhdon dhe për një mandat, se na jemi të kënaqur me punën tënde, e jo me ardh me thanë a po e lëshon se kom shumë presion për Drenasin. Ai u ndiku edhe nga eksponentë të komunave të tjera”, ka treguar Lladrovci.
Ramiz Lladrovci tutje ka deklaruar se nuk mund të largohet nga PDK-ja dhe do të vazhdojë të jetë pjesë e garës për kryetar të Drenasit.
“Unë e kom thanë edhe do ta them, nuk ka bire nane që më largon nga PDK-ja. PDK-ja nuk më ka nominuar për kandidat, ai mundet të më shkarkojë nga pozita sepse unë akoma jam kryetar i PDK-së në Drenas, por prej partisë nuk mundet me më heq. Unë në rundin e parë do të jem”, ka thënë Lladrovci.
