Nga janari deri në korrik të këtij viti janë pasivizuar 174 adresa në Komunën e Preshevës, ndërsa 26 në Komunën e Bujanocit.
Kështu ka bërë të ditur ish-kryetari i Këshillit Kombëtar Shqiptar, Nevzad Luftiu, përmes një postimi në Facebook.
“E frikshme, po shuhemi! Më datë 04.08.2025, i kërkova qasje në informacione stacioneve policore në Bujanoc dhe Preshevë, me pyetjen: Sa adresa janë pasivizuar në këto dy komuna, nga janari deri në korrik 2025? Përgjigjen me shkrim e mora dje: gjatë periudhës së lartpërmendur, në Komunën e Preshevës janë pasivizuar 174 adresa, ndërsa në Komunën e Bujanocit 26 adresa. Dyshoj se të dhënat për Komunën e Bujanocit janë të sakta (jam në pritje të një përgjigjeje tjetër për ta vërtetuar)”, ka shkruar ai.
Sipas tij, në total, brenda 7 muajve, në këto dy komuna me shumicë shqiptare janë pasivizuar 200 adresa.
Lutfiu ka theksuar se kjo që po ndodh është racizëm dhe një spastrim i pastër etnik, për çka u ka bërë thirrje të gjithë akterëve politikë shqiptarë që të mblidhen “për t’u koordinuar dhe për të bashkëvepruar”.
“Sidoqoftë, në total, brenda 7 muajve, në këto dy komuna me shumicë shqiptare janë pasivizuar 200 adresa. Ajo që po ndodh është racizëm, një spastrim i pastër etnik. U bëj thirrje të gjithë akterëve politikë shqiptarë që të mblidhen për t’u koordinuar dhe për të bashkëvepruar”, ka përfunduar Lutfiu.
