Të mërkurën në mesnatë është mbyllur afati për aplikim të subjekteve politike dhe dorëzimin e listave me kandidatët për zgjedhjet lokale të 12 tetorit, ku do të zgjidhen kryetarët e komunave dhe anëtarët e kuvendeve komunale.
Zëdhënësi i Komisionit Qendror të Zgjedhjeve (KQZ), Valmir Elezi, ka konfirmuar për Tëvë1 se gjatë ditës së sotme do të publikohet lista me të gjitha subjektet politike që kanë aplikuar për certifikim.
Mbledhja e radhës e KQZ-së do të mbahet të enjten, më 14 gusht, në orën 14:00. Në rend dite është certifikimi i nëntë subjekteve politike, nga të cilat katër janë iniciativa qytetare dhe pesë kandidatë të pavarur.
Sipas KQZ-së, këto subjekte përfaqësohen nga gjithsej 66 kandidatë, prej tyre katër për kryetarë komunash dhe 62 për anëtarë të kuvendeve komunale.
