Shqipëria po përballet me një situatë të rënduar nga zjarret, me dhjetëra vatra aktive në disa zona të vendit. Kryeministri Edi Rama e ka cilësuar këtë si një ditë “sakrifice dhe krenarie” për të gjitha strukturat shtetërore të angazhuara në operacionet e emergjencës.
Sipas të dhënave zyrtare, gjatë 24 orëve të fundit janë evidentuar 34 vatra aktive, prej të cilave 13 janë izoluar dhe shuar.
Në terren janë angazhuar mbi 600 forca të Forcave të Armatosura, zjarrfikës, punonjës bashkiakë dhe vullnetarë, të mbështetur nga dhjetëra mjete zjarrfikëse, automjete transporti, 5 helikopterë dhe 1 avion zjarrfikës Canadair i ofruar nga Italia. Po ashtu, qindra autoambulanca dhe mjete për evakuimin e banorëve janë në gatishmëri.
Ndër zonat më të prekura që kërkojnë vëmendje të veçantë janë: Delvina, Poliçani, Gramshi, Dropulli, Finiqi, Berati, Tepelena dhe Bulqiza, ku operacionet ajrore dhe tokësore po vijojnë.
Rama theksoi gatishmërinë maksimale të strukturave shtetërore dhe rëndësinë e bashkëpunimit me partnerët evropianë dhe Emiratet e Bashkuara Arabe, të cilët po mbështesin Shqipërinë në përballimin e kësaj situate të vështirë.
