Por, ai thotë se i vije keq se ku po e pret Veseli këtë ditëlindje, porse shton që i ka vizituar dhe se e di në çfarë gjendje janë.
“Dhe më vjen shumë keq që keq se ku po e pret atë ditëlindje. Por i kam vizituar dhe i njoh se si janë dhe në çfarë gjendje janë. Kjo është një barrë jo personale për ta, por për tërë luftën për liri”, tha Krasniqi për RTK-në.
Kurse, sa i përket formimit të Gjykatës Speciale, Krasniqi thotë se është votuar nga PDK-ja, por që nuk po merret me atë për të cilën është themeluar.
Madje, ai ka rikujtuar kohën kur është vonuar Gjykata Speciale, pikërisht nga deputetët e subjektit që ai i takon.
“Kjo gjykatë nuk po merret me ato dyshime të çmendura të raportit të Dick Martyt. I gjithë faktori ndërkombëtar na ka thënë se kjo e zezë duhet të hiqet duke inkurajuar të votohet. Ne kemi thënë se nuk kemi pse t’i ikim të vërtetës, sepse nuk ka pasur çfarë të fshihet. Ata deputetë e kanë votuar, por nuk e kanë pritur se do të dalë kështu”, thotë Krasniqi.
Kryetari i PDK-së u shpreh se iniciativa ka qenë që Gjykata Speciale të jetë në Kosovë dhe kjo ka qenë iniciativa e atëhershme në Kuvendin e Kosovës.
“Kjo gjykatë është sipas ligjeve të Kosovës, por kjo gjykatë nuk i jep askujt llogari, as Presidentes, as Kuvendit as KGJK-së dhe askujt”, u shpreh kreu i PDK-së.
Ai thotë se është i bindur se përkundër telasheve me të cilat po ballafaqohen të akuzuarit në Hagë, drejtësia është në anën e popullit të Kosovës.
“E drejta është në anën tonë sepse UÇK ka mbrojtur pragun e shtëpisë së vet”.
Ai tha se shpreson se nuk do të jetë procesi i gjatë gjyqësor.
“Është e pakuptimtë që deri më tash nuk është aplikuar mbrojtja në liri. Si ka mundësi që ata të ikin kur vetë janë dorëzuar”, u shpreh Krasniqi, duke shprehur habinë për vendimet e njëpasnjëshme të gjykatës që ua refuzon Thaçit e të tjerëve kërkesat që të mbrohen në liri.
“Në kontekstin e atëhershëm, nuk ka pasur mundësi të mos krijohet kjo gjykatë”, rikujtoi Krasniqi.
Sipas tij, duke nisur nga sponsorizuesit e pavarësisë së Kosovës, si SHBA e të tjerët, të gjithë thoshin se duhej të hiqet kjo njollë e zezë, për ato dyshimet të ngritura.
“Na thoshin, se po thuhet se njerëzit tuaj kanë shitur veshkë”, thotë Krasniqi, duke shpjeguar kërkesat e miqve ndërkombëtarë që kërkonin që Gjykata të krijohet.
“Por puna e Gjykatës ka devijuar dhe nuk është duke u marrë me pretendimet për të cilat është krijuar”.
Në këtë rast ai tha se shteti ka vetëm një rol, e ajo është ndihma financiare ndaj ekipeve mbrojtëse, për të akuzuarit dhe familjarët e tyre, për t’iu lehtësuar shpenzimet.