Instituti Hidrometeorologjik i Kosovës (IHMK) ka publikuar një analizë klimatike për muajin korrik 2025, duke konfirmuar regjistrimin e temperaturave rekord në disa pjesë të vendit. Në Klinë është matur temperatura më e lartë ndonjëherë prej 42.4°C, ndërsa në Han të Elezit u regjistruan 42.3°C, vlera që tejkalojnë rekordet historike të vendit.
Kjo valë ekstreme e të nxehtit reflekton ndikimin e drejtpërdrejtë të ndryshimeve klimatike globale, që sipas modeleve ndërkombëtare parashikojnë rritje të valëve të të nxehtit, thatësira të gjata dhe reshje të pakta në rajonin e Ballkanit.
Temperaturat mbi 42°C janë shumë më të larta se mesatarja korrike prej 30-35°C.
Janë regjistruar 325.5 orë me diell, duke treguar dominim të kushteve anticiklonike dhe mungesë reshjesh.
Sasia minimale e reshjeve ka çuar në tharje të tokës dhe rritje të rrezikut nga zjarret.
Temperatura më e lartë para këtij korriku ishte 40.8°C në Prizren, më 1987. Rritja prej më shumë se 1.5 gradësh gjatë 38 viteve të fundit tregon një trend të vazhdueshëm ngrohjeje.
IHMK thekson nevojën për masa të menjëhershme dhe të koordinuara për përshtatje ndaj ndryshimeve klimatike, duke përfshirë monitorim të avancuar, plane urbane të qëndrueshme, sisteme paralajmëruese dhe politika mjedisore.
Korriku 2025 paraqet një paralajmërim të qartë për sfidat klimatike që po përballen Kosova dhe rajoni në përgjithësi.
