Një kafene të dielën u shndërrua në skenë krimi.
Në qendër te Gjilanit tre persona u vranë e disa tjerë u plagosën.
Babë e bir dhe dhëndri i tyre dyshohet se u privuan nga jeta nga Mefail Shkodra si i dyshuar kryesor, bashkë me dy djemtë e tij.
Tashmë të njëjtit janë edhe në kërkim nga Policia e Kosovës.
I dyshuari kryesor, ishte arrestuar vitin e kaluar për veprën penale të fajdes, por që ishte liruar.
“Ka precedentë penal ka raste të sulmit 5 raste, prishja e rendit dhe qetesisë publike 2 raste, fajde janë 3 raste, mashtrim në 1 rast, kërcënim në tri raste, shantazh e ka një rast, detyrim janë dy raste, pjesëmarrje ose organizim igrupit krimkinal një rast dhe në kaudër të kundërvajtjtve tjera që në total janë 31 raste”, tha drejtori rajonal i Policisë në Gjilan, Agron Rukiqi.
Drejtori rajonal i Policisë ka njoftuar se tashmë kanë arrestuar një person dhe kanë kryer kontrolle në tri lokacione.
Kurse sipas Prokurorit të Shtetit, motivet e vrasjes ende nuk dihen dhe se detaje do të bëhen të ditura ditëve në vazhdim.
“Për motivet e këtij rasti është ende herët të dalim me një qëndrim për shkak se ditëve në vijim do të merren në pyetje fillimisht viktimat apo të dëmtuarit më pas do të mësojmë nëse na japin viktimat apo të dëmtuarit ndonjë sinjal apo version të tyre atëherë do ta kemi më të qartë se a ka ndonjë motiv apo rasti ka ndodhur aty për aty”, tha prokurori i rastit, Jusuf Sadiku.
Dy nga viktimat, ishin dërguar në Emergjencën e qytetit por që përkundër përpjekjeve të njëjtit nuk arritën t’u bëjnë ballë plagëve.
“Puls të shpejtë, taki kardi, gjendje shumë e rëndë kemi filluar reanimin, gjendjen e vijave venoze, intubimin, me gjithë angazhimin tonë pacienti ekzitoi dmth nuk i mbijetoi plagëve të marra. Pas këtij ndërkohë pas 50 minutave janë sjellë edhe pacientët tjerë njëri i moshës 58 pa shenja jete, dhe pacienti i moshës 1984 që ka pasë plagë të ndryshme, plagë në kokë, plagë me armë zjarri”, deklaroi kujdestari i Emergjencës, Ekrem Murtezi.
Nga Policia u bë e ditur se tashmë kanë kërkuar edhe bashkëpunim ndërkombëtar dhe janë njoftuar të gjitha pikëkalimet kufitare për kërkimin e të dyshuarve.
