Deputeti më i vjetër i kësaj legjislature, Avni Dehari është konstatuar se me thirrjet që ka bërë për votim të fshehtë nuk janë në pajtueshmëri me aktgjykimin e Gjykatës Kushtetuese.
Kështu ka vlerësuar kjo Gjykatë në njoftimin e publikuar të premten ku tregon për vendimet që janë marrë për seancën konstituive të Kuvendit.
“TË URDHËROJË, Kryesuesin e Seancës Konstituive të Kuvendit të Republikës së Kosovës të vazhdojë me pikën 3 të rendit të ditës së Seancës Konstituive, të miratuar më 8 prill 2025, dhe në pajtim me paragrafin 2 të nenit 67 të Kushtetutës së Republikës së Kosovës, të ftojë përfaqësuesin e grupit më të madh parlamentar për të propozuar kandidatin/en për Kryetar/e të Kuvendit të Republikës së Kosovës, i/e cili/cila zgjedhet përmes votimit të hapur, votimi i cili mund të realizohet vetëm deri në 3 (tre) herë për kandidatin/en e njëjtë”, thuhet nga Gjykata Kushtuese.
Po ashtu, aty thuhet se deputetët e zgjedhur nuk kanë zbatuar aktgjykimin e 26 qershorit, andaj seancat e mbajtura nga 27 qershor deri më 26 korrik të shpallen të pavlefshme.
Derisa theksohet se kryetari duhet të zgjidhet brenda 30 ditësh.
“TË URDHËROJË, deputetët e zgjedhur të Kuvendit të Republikës së Kosovës, në pajtim me paragrafët 2, 3 dhe 4 të nenit 67 të Kushtetutës së Republikës së Kosovës të zgjedhin Kryetarin/en dhe nënkryetarët e Kuvendit të Republikës së Kosovës sipas pikave 3 dhe 4 të rendit të ditës të Seancës Konstituive brenda 30 (tridhjetë) ditëve nga dita e hyrjes në fuqi të këtij Aktgjykimi”.
Organi më i lartë kushtetues ka urdhëruar të gjithë deputetët që gjatë procedurës së zgjedhjes së kryetarit dhe nënkryetarëve të Kuvendit të jenë të pranishëm dhe të votojnë.
Ky vendim po mirëpritet nga monitorues të punës së Legjislativit, megjithatë vlerësohet se ka lënë edhe shumë pikëpyetje.
“Çfarë ndodhë hipotetikisht nëse eventualisht edhe për këto 30 ditë pavarësisht votimit të hapur, pavarësisht ndërrimit të kandidaturave, nuk arrihet të konstituohet Kuvendi brenda këtij afati. A do të jetë ndërrim i së drejtës së propozuar pra t’i kalohet një grupi tjetër parlamentar, apo vendi do të shkojë në zgjedhje në kuptimin e asaj që të konstatohet që këta deputetë nuk e përmbushën detyrimin kushtetues për konstituimin e Kuvendit dhe rrjedhimisht të detyrohet presidentja të shpallen zgjedhjet”, tha Vullnet Bugaqku nga KDI.
Ai shtoi se duhet shpjeguar nga Gjykata edhe se sa herë i takon grupit më të madh parlamentar për të propozuar emrin për kandidatë.
