Pas miratimit të marrëveshjes për pranim të fajësisë nga Gjykata Themelore në Prishtinë ndaj Igor Popoviq, ka reaguar Prokuroria Speciale e Republikës së Kosovës, duke riafirmuar përkushtimin për ndjekjen e veprave që cenojnë bashkëjetesën ndërmjet komuniteteve etnike.
Në reagimin zyrtar, Prokuroria thekson se do të vazhdojë të trajtojë me prioritet veprat penale që cënojnë rëndë vlerat demokratike dhe harmoninë ndëretnike në vend.
“Prokuroria Speciale riafirmon përkushtimin e saj për ndjekjen dhe hetimin e këtyre veprave penale, të cilat cenojnë rëndë vlerat demokratike dhe bashkëjetesën ndërmjet grupeve etnike që jetojnë në Republikën e Kosovës,” thuhet në reagim.
Igor Popoviq u akuzua për nxitje të urrejtjes dhe mosdurimit ndërmjet grupeve etnike, pas një fjalimi të mbajtur më 18 korrik 2025, rreth orës 12:00, në një tubim publik në Rahovec.
Sipas aktakuzës, ai ka vepruar me dashje dhe qëllim, duke përhapur publikisht mesazhe që dëmtojnë rendin kushtetues dhe harmoninë ndërmjet komuniteteve në Kosovë.
Ndërkohë, pas arrestimit të tij, autoritetet serbe kanë reaguar me propagandë, duke ndërtuar një narrativë se “Kosova po diskriminon serbët”, çka është kundërshtuar nga institucionet kosovare si përpjekje për devijim të vëmendjes nga thelbi i veprës penale.
