Një person është arrestuar të enjten në Prishtinë nën dyshimin se ka sulmuar zyrtarët policorë. Sipas raportit 24-orësh të Policisë së Kosovës, nga sulmi kanë pësuar lëndime trupore dy policë, të cilët janë trajtuar mjekësisht.
Ngjarja ka ndodhur rreth mesditës në rrugën “Ahmet Krasniqi” në kryeqytet.
I dyshuari është ndaluar nga autoritetet dhe, me vendim të prokurorit, është dërguar në mbajtje.
Policia po vazhdon hetimet lidhur me rastin.
“Është arrestuar i dyshuari mashkull kosovar, pasi që i njëjti nuk ka respektuar urdhrat e zyrtarëve policorë, si dhe i ka sulmuar fizikisht ata. Si pasojë e sulmit fizik dy zyrtarët policorë kanë pësuar lëndime trupore dhe kanë pranuar tretman mjekësor. I dyshuari me vendim të prokurorit është dërguar në mbajtje”, thuhet në njoftimin e policisë.
