Organizatat e dala nga lufta e Ushtrisë Çlirimtare të Kosovës do të mbajnë sot një protestë në Prishtinë, me fillim nga ora 17:00, për të kundërshtuar, siç theksojnë ato, padrejtësitë që po bëhen nga Gjykata Speciale ndaj ish-krerëve të UÇK-së që po gjykohen në Hagë.
Në një konferencë për media të mbajtur të mërkurën, organizatorët i bënë thirrje qytetarëve për pjesëmarrje masive, në mbështetje të luftës çlirimtare dhe për të kundërshtuar përdorimin e dosjeve të Serbisë si prova në proceset gjyqësore ndaj ish-udhëheqësve të UÇK-së.
Protesta ka marrë përkrahje nga tri partitë më të mëdha opozitare,Partia Demokratike e Kosovës (PDK), Lidhja Demokratike e Kosovës (LDK),Aleanca për Ardhmërinë e Kosovës (AAK).
Këto parti kanë shprehur qëndrimin e tyre pro protestës, duke e konsideruar të domosdoshme mbështetjen për ata që, sipas tyre, po përballen me procese të padrejta në Hagë.
Nga ana tjetër, Lëvizja Vetëvendosje ka shprehur rezerva ndaj protestës. Zëdhënësi i kësaj partie, Arlind Manxhuka, përmes një postimi në Facebook, ka kritikuar opozitën dhe kohën kur po organizohet protesta.
“Protesta është dhjetë vjet e vonuar. Është dashur që në verën e vitit 2015 të kundërshtohet pushteti i atëhershëm,” ka shkruar ai.
Manxhuka ka theksuar se historia e Kosovës dhe e luftës çlirimtare nuk mund të ndryshohet, por po ashtu as historiku i themelimit të Gjykatës Speciale, duke e quajtur këtë të fundit një gjykatë jotransparente dhe jashtë praktikave ndërkombëtare.
Ai ka renditur disa argumente kundër qasjes së opozitës, duke theksuar ndër të tjera se:
- Qeveria Kurti ka paguar mbi 33 milionë euro për mbrojtjen e të akuzuarve në Hagë dhe shpenzime të tjera;
- Ish-presidenti Hashim Thaçi, në intervistën e fundit nga Haga, ka qenë “i butë” ndaj Gjykatës Speciale;
- Opozita po e përdor çështjen e të akuzuarve më shumë për sulme politike ndaj qeverisë, sesa për angazhim serioz për lirimin e tyre.
Protesta e sotme pritet të mbledhë një numër të madh qytetarësh, por përplasjet politike lidhur me qëllimin, kohën dhe përgjegjësitë për Gjykatën Speciale po vazhdojnë të jenë temë e debatit të ashpër publik dhe politik në vend.
