Kompania Rajonale e Ujësjellësit “Prishtina” ka njoftuar se do të intensifikojë aksionin për ndëshkimin e konsumatorëve që kanë borxhe ndaj shërbimeve të ujit të pijshëm. Sipas një komunikate për media, aksioni do të vazhdojë deri në fund të vitit 2025.
“Si pjesë e planit të vazhdueshëm në mbledhjen e detyrimeve për garantim me furnizim me ujë të pijshëm, aksioni për ndëshkimin e konsumatorëve me borxhe ndaj shërbimeve të ujit do të vazhdojë deri në fund të vitit 2025. Por kësaj here me intensitet edhe më të shtuar,” thuhet në njoftim.
Kompania ka paralajmëruar masa të ashpra edhe për lidhjet ilegale të ujit, duke theksuar se do të ketë “0 tolerancë” ndaj çdo shkeljeje të këtij lloji.
“S’ka ujë të trajtuar, pa paguar faturat!” përfundon komunikata e KRU “Prishtina”.
Ky aksion është pjesë e përpjekjeve të kompanisë për të rritur nivelin e pagesave dhe për të garantuar cilësi dhe vazhdimësi në shërbimet me ujë të pijshëm për të gjithë qytetarët.
