Vullnet Bugaqku nga Instituti Demokratik i Kosovës (KDI) ka kritikuar ashpër vendimin e presidentes Vjosa Osmani për të tërhequr kërkesën ndaj Gjykatës Kushtetuese. Në emisionin “Mesditë” në Tëvë1, ai e cilësoi këtë veprim si të papranueshëm dhe në kundërshtim me rolin kushtetues të presidentes.
“Mendoj që sjellja e djeshme e presidentes, po flas në kuptimin e funksionit kushtetues që ka, është një sjellje dhe një veprim tejësisht absurd dhe, madje, për mendimin tim, përbën edhe një shkelje të kompetencave të rolit që ka ajo si garantuese e funksionimit demokratik dhe kushtetues të institucioneve të Republikës së Kosovës”, tha Bugaqku.
Ai theksoi se presidentja është organ kushtetues që garanton funksionimin e institucioneve dhe jo një aktor që ushtron presion mbi to.
“Presidentja, sipas Kushtetutës, është organ që garanton funksionimin demokratik dhe kushtetues të institucioneve dhe nuk duhet të jetë organ i cili i sulmon institucionet, sulmon integritetin e gjyqtarëve dhe madje paragjykon mënyrën se si trajtohet një çështje brenda një organi kushtetues. Nuk i takon dhe nuk i ka hije presidentes të tregojë gjyqtarëve apo Gjykatës Kushtetuese se cili gjyqtar duhet ta trajtojë rastin e saj”, shtoi ai.
