I dërguari special i presidentit të SHBA-së, Donald Trump, Steve Witkoff, mbërriti në Moskë, raportuan mediat shtetërore ruse të mërkurën, disa ditë para afatit të Shtëpisë së Bardhë që Rusia të arrijë një marrëveshje paqeje me Ukrainën, përndryshe do të përballet me sanksione të rënda ekonomike .
Witkoff u pa duke bërë një shëtitje herët në mëngjes nëpër Parkun Zaryadye, shumë pranë Kremlinit, me Kirill Dmitriev, të dërguarin e presidentit rus për investime dhe bashkëpunim ekonomik, sipas pamjeve të transmetuara nga TASS, citon AP.
Dmitriev kishte luajtur një rol kyç në bisedimet e drejtpërdrejta të paqes midis Rusisë dhe Ukrainës në Stamboll në muajt e fundit, si dhe në diskutimet midis zyrtarëve rusë dhe amerikanë.
Moska ende nuk ka konfirmuar nëse Witkoff do të takohet me Presidentin rus Vladimir Putin gjatë qëndrimit të tij.
Zëdhënësi i Kremlinit, Dmitry Peskov, e mirëpriti të hënën vizitën e Witkoff. “Ne i konsiderojmë (bisedimet me Witkoff) të rëndësishme, thelbësore dhe shumë të dobishme”, tha ai.
Afati i fundit i Trump për Putinin përfundon të premten. Uashingtoni ka kërcënuar me “tarifa të ashpra” dhe penalizime të tjera ekonomike nëse vrasjet nuk ndalen në Ukrainë.
Ndërkohë, Kremlini edhe më parë ka këmbëngulur se sanksionet ndërkombëtare të vendosura që nga pushtimi i fqinjit të saj në shkurt 2022 kanë pasur një ndikim të kufizuar./teve1/
