Erdhën nga të gjitha rajonet e Kosovës.
Inspektorët e Punës u mblodhën mëngjesin e së martës në ambientet e Inspektoratit Qendror të Punës.
Arsye për këtë ishte një aksion që ndërmorrën në rajonin e Prizrenit, në sektorin e ndërtimtarisë.
“Si Drejtori kemi vendosë duke parë gjendjen në rajonin e Prizrenit kemi vendosë t’i bëjmë inspektimet, të marrim aksion dhe të përmirësojmë gjendjen në teren”, ka thënë Plakolli.
Me të arritur në lokacionin e takimit me inspektorët, u shpërndanë edhe grupet në disa rajone të Prizrenit.
“Liridon Isufi, Agron Llulluni janë grupi një. Egzon Bahtiri, Bajram Berisha grupi dy, Lazim Bajrami, Fitim Dedinca grupi tre” , ka thënë Latifi.
Pasi morën detyrat, u nisën drejt terenit.
Inspektimet dhanë rezultatet e para.
Në këtë vendpunishte, nuk po respektoheshin aspak masat e sigurisë.
Andaj edhe ndaj subjektit në fjalë, u morën masat bazuar në ligjin në fuqi.
“Këtu nuk ka masa të sigurisë adekuate në asnjë kat, duke filluar nga hapësirat e liftit, shkallëve si dhe siç pe shihni në asnjë kat nuk ka vendosur masa mbrojtëse për mos rënie të punëtorëve… Tani e përpilojmë një raport dhe nxjerrim një vendim për suspendim të përkohshëm të punimeve”, ka thënë Berisha.
Veprime të njëjta pritet të merren së shpejti në gjithë vendin, me fokus mbrojtjen e punëtorëve në vendin e punës.
“Në rajonin e Prishtinës aktualisht përgjatë 15 ditë inspektime kemi bërë 130 inspektime, të cilat kanë rezultuar 130 me mbyllje… Në Rajonin e Prizrenit kemi filluar fokusin kryesor në sigurinë dhe shëndetin në punë, aty ku nuk respektohet ligji për shëndet në punë aty do të fillojmë me ndaljen e punimeve”, ka thënë tutje Plakolli.
Ushtruesi i detyrës së kryeinspektorit ka edhe një apel për punëdhënësit.
“Apeli kryesor i Inspektoratit Qendror të Punës është që t’i pajisin me mjete të sigurisë në vendin e punës dhe të krijojnë kushte dhe ambiente të sigurta për punëtorët… Po gjithsesi do të ketë aksione edhe në rajone tjera duke përfshirë krejt nivelin e vendit”, ka përfunduar Plakolli.
Nga fillimi i vitit deri më tash, nëntë persona janë regjistruar që kanë humbur jetën si pasojë e aksidenteve në punë.
