Për vite të tëra mbajti pozita drejtuese në Policinë e Kosovës.
Kolonel Nexhmi Krasniqi, së fundmi ishte drejtor i policisë kufitare në rajonin e Perëndimit.
Por të hënën ai u prangos nga hetues të Inspektoratit Policor të Kosovës në një aksion të përbashkët me Prokurorinë Themelore në Prizren.
Ai bashkë me tre persona tjerë të arrestuar dyshohen për veprën penale “Detyrimi” dhe “Shmangie nga tatimi”.
“Ky aksion është rezultat i një hetimi disa mujor, i cili është zhvilluar me profesionalizëm dhe përkushtim nga hetuesit e IPK-së në bashkëpunim të plotë me Prokurorinë Themelore në Prizren. Aktualisht, hetuesit e IPK-së, në koordinim me Prokurorinë Themelore në Prizren, janë duke vazhduar me ndërmarrjen e veprimeve të tjera hetimore në terren, në funksion të zbardhjes së plotë të çështjes dhe grumbullimit të provave relevante. Gjithashtu IPK, si pjesë e procedurës administrative ka rekomanduar suspendimin e kolonelit policor”, kanë thënë nga IPK dhe Prokuroria themelore në Prizren.
Koloneli tashmë është suspenduar nga puna dhe me vendim të prokurorit të dyshuarit janë në mbajtje prej 48-orësh.
“Institucionet e zbatimit të ligjit mbeten të përkushtuara në bashkëpunim ndërinstitucional dhe të vendosura në luftën kundër çfarëdo forme të krimit, përfshirë edhe atë të kryer nga zyrtarë publik”, thuhet tutje në njoftim.
Ndaj këtij aksioni ka reaguar edhe ministri në detyrë i punëve të Brendshme, duke thënë se kriminelët nuk kanë vend brenda Policisë së Kosovës.
“Mbështes dhe njëkohësisht insistoj në veprime edhe më të vendosura të Inspektoratit, që radhët e Policisë të pastrohen nga elementë të tillë që njollosin emrin e institucionit më kredibil dhe me besueshmërinë më të madhe në vend. Policia e Kosovës duhet te jetë adresë e luftimit të krimit dhe asnjëherë dhe ne asnjë rrethanë çerdhe banimi e mburojë e veprimtarive kriminale”, ka thënë MPB-ja.
Tëvë1 ka pyetur Prokurorinë Themelore në Prizren se cila do të jetë masa që do të kërkojnë ndaj të arrestuarve, por që deri në publikimin e kronikës nuk kanë dhënë përgjigje.
