Presidentja e Republikës së Kosovës, Vjosa Osmani, ka deklaruar se vendimi për të tërhequr kërkesën e saj drejtuar Gjykatës Kushtetuese, lidhur me rendin kushtetues, është marrë si një veprim i domosdoshëm për të mbrojtur interesin publik dhe vetë rendin kushtetues të vendit.
Ajo ka sqaruar se gjyqtari Radomir Llaban, i cili është caktuar gjyqtar raportues në këtë rast, është emëruar në vitin 2018 dhe vazhdon të ushtrojë funksionin e tij përkundër informatave të përcjella nga institucionet e sigurisë, që e lidhin atë me veprimtari të rrezikshme kundër rendit kushtetues të Kosovës.
Presidentja theksoi se Kushtetuta parasheh një procedurë të qartë për shkarkimin e një gjyqtari të Gjykatës Kushtetuese, që nuk mund të iniciohet nga Presidentja pa vendim paraprak nga vetë Gjykata.
“Sipas Kushtetutës, shkarkimi i një gjyqtari të Gjykatës Kushtetuese bëhet vetëm pasi të votohet një gjë e tillë nga 2/3 e gjyqtarëve dhe pastaj shkarkimi i propozohet presidentes nga vetë Gjykata. Pa një propozim të tillë nga Gjykata, sipas Kushtetutës nuk mund të ndërmerret nga aspekti kushtetues asnjë hap nga ana e presidentes,” deklaroi Osmani.
Në këtë kontekst, ajo theksoi se vendimi për tërheqjen e kërkesës nga Kushtetuesja ishte i nevojshëm:
“Në interesin e Kosovës dhe qytetarëve të saj, tërheqja e kësaj kërkese është veprim i domosdoshëm në funksion të mbrojtjes së rendit kushtetues.”
Presidentja Osmani gjithashtu ngriti shqetësimin se vetë fakti që një gjyqtar që konsiderohet si rrezik për rendin kushtetues nga institucionet e sigurisë të vendit është vendosur të trajtojë një rast që ka të bëjë pikërisht me mbrojtjen e këtij rendi, paraqet një kontradiktë serioze.
“Është absurde të pritet që rendi ynë kushtetues të mbrohet pikërisht nga personat që, sipas institucioneve tona të sigurisë, e rrezikojnë rendin kushtetues të Republikës së Kosovës,” u shpreh ajo
