Serbia i ka shitur Izraelit më shumë municione gjatë gjashtë muajve të parë të vitit 2025 sesa gjatë gjithë vitit 2024.
Sipas Rrjetit Ballkanik të Gazetarisë Investigative (BIRN), në gjysmën e parë të këtij viti Serbia eksportoi municione drejt Izraelit me vlerë rreth 55.5 milionë euro — më shumë se shifra rekord prej 47.9 milionë eurosh gjatë të gjithë vitit të kaluar, citon TRT Albanian.
Raporti thekson se ndër blerësit është edhe një kompani e madhe izraelite, të cilën raportuesja e OKB-së, Francesca Albanese, e ka përmendur në raportin e saj si një “përfituese nga gjenocidi i vazhdueshëm” në Gaza.
Në fillim të qershorit, presidenti serb Aleksandar Vuçiq deklaroi në një intervistë për mediat izraelite se Serbia ishte i vetmi vend në Evropë që i shiste municion Izraelit.
Më 23 qershor, ai njoftoi se pas përshkallëzimit të konfliktit pas sulmeve izraelite ndaj Iranit, eksportet e municioneve drejt Izraelit janë ndaluar.
