Analisti nga Maqedonia e Veriut, Mersel Bilalli, ka vlerësuar se reagimi i kryeministrit të Maqedonisë së Veriut, Hristijan Mickoski, për thirrjet anti-shqiptare në Kumanovë, ka ardhur vetëm pas presionit të madh të partive shqiptare dhe atyre maqedonase.
Bilalli ka hedhur dyshime se adhuruesit sportiv të cilët në ndeshjen e së shtunës në Kumanovë, ku Maqedonia e Veriut humbi 80:72 përdorën thirrje e sllogane antishqiptare, janë të lidhur ngushtë me udhëheqësinë e VMRO-DPMNE-së.
“Po ka pasur pas një presioni shumë të madh jo vetëm të partive shqiptare, por edhe të Lidhjes Socialdemokrate maqedonase dhe shumë intelektualëve dhe gazetarëve maqedonas të cilët tanimë këtë e konsiderojnë shumë të dëmshme dhe shumë të rrezikshme që e dëmton dukshëm interesin vital të Maqedonisë. Pra, ka pasur një reagim shumë të ashpër edhe në pjesën maqedonase ndaj VMRO-DPMNE-së dhe vetëm pas asaj kryeministri e pa të udhës të reagojë. Mirëpo, mos të harrojmë se ata adhurues sportiv janë të lidhur ngushtë me udhëheqësinë e VMRO-DPMN-së, me siguri ata kanë menduar se do të provojnë tash para zgjedhjeve ta animojnë elektoratin nacionalist të tyre e që nga natyra është e tillë dhe nuk e kanë pritur se reagimi do të jetë shumë I ashpër”, është shprehur Bilalli në emisionin “Ditari” në Tëvë1.
Ndryshe, më 02 gusht u luajt ndeshja Maqedoni e Veriut-Rumani në kuadër të parkualifikimeve të Kupës së Botës në basketboll.
Në media është raportuar që gjatë ndeshjes ka pasur thirrje antishqiptare dhe thirrje për vdekjen e shqiptarëve.
Kryeministri i Maqedonisë së Veriut, Hristijan Mickoski, i cili ishte i pranishëm në ndeshje, i dënoi të hënën “thirrjet nacionaliste dhe ksenofobe”.
Duke folur për mediat, Mickoski tha se, ndonëse ishte në sallë gjatë ndeshjes, “nuk i kishte vënë re” thirrjet e tifozëve, duke pretenduar se bëhej fjalë për “një grup të vogël njerëzish”.
“Dua ta shfrytëzoj këtë rast për t’iu bashkuar dënimit të nacionalizmit dhe ksenofobisë – së pari për atë që ndodhi gjatë ndeshjes së basketbollit ndërmjet Maqedonisë [së Veriut] dhe Rumanisë, e më pas për të dërguar një mesazh te të gjitha grupet e tifozëve: të mbështesin në mënyrë sportive, ta përkrahin ekipin e tyre dhe përfaqësuesen kombëtare të Maqedonisë”, tha Mickoski.
Ai tha se thirrjet kundër shqiptarëve “do të jetë objekt hetimi dhe sanksionesh, pa marrë parasysh nga vjen”. Prokuroria maaqedonase ka nisur hetimet për këtë ngjarje.
“Dua të përsëris edhe një herë: e dënoj në mënyrë absolute brohoritjen e pazakontë dhe të papranueshme të disa individëve, të cilët nuk hasën në mbështetje nga asnjë prej të pranishmëve në sallë”, tha ai.
