I akuzuari për sulm ndaj pjesëtarëve të KFOR-it në Zveçan, Millosh Antoviq dhe Prokuroria Speciale kanë arritur marrëveshje për pranimin e fajësisë.
Sipas prokurorit special, Bekim Kodraliu, i akuzuari pranimin e fajësisë për veprat penale “Sulm ndaj personit zyrtar”, “Pjesëmarrje në turmë që kryen vepër penale – huliganizëm”, “Blerje, posedim, shpërndarje dhe shitje e paautorizuar e narkotikëve” dhe “Posedim i paautorizuar i armëve” e ka bërë me vullnet të lirë dhe pa presion.
“Prokuroria Speciale ka zhvilluar negociata për pranimin e fajësisë me të akuzuarin Millosh Antoviq, në prezencë të mbrojtësit të tij. Kemi arritur marrëveshje për pranim të fajësisë me të akuzuarin, i cili pajtohet me akuzat si në vijim, “sulm ndaj personit zyrtar”, “pjesëmarrja në grup qe kryen vepër penale të huliganizmit”, “blerja, posedimi dhe shpërndarja e substancave narkotike, psikotrope dhe analoge”, “armëmbajtje pa leje”. Pranimin e fajësisë, Antoviq e ka bërë më vullnet të lirë e pa presion”, ka thënë Kodraliu.
Prokuroria ka propozuar që ndaj Antoviqit të shqiptohet dënim unik prej 5 vjetësh burgim dhe gjobë 20 mijë euro.
“Andaj, propozojmë që Millosh Antoviq t’i shqiptohet një dënim unik prej 5 vitesh burg efektiv dhe gjobë prej 20 mijë euro, duke llogaritur edhe kohën e kaluar në paraburgim”, ka njoftuar Kodraliu.
Marrëveshja për pranim fajësie më pas u aprovua nga gjykatësi Valon Kurtaj, ndërsa edhe shpallja e aktgjykimit do të bëhet sot.
“Gjykata merr aktvendim të pranohet marrëveshja për pranim të fajësisë”, ka theksuar Kurtaj.
Ndryshe, Millosh Antoviq akuzohet për sulmin më 29 maj të vitit 2023 në Zveçan, ku u lënduan disa ushtarë të KFOR-it dhe pjesëtarë të Policisë së Kosovës.
