Punimet kishin nisur në vitin 2021.
Por ato ishin ndërprerë përkohësisht. Megjithatë, puna ka nisur së fundmi.
Megjithëkëtë ky projekt në sheshin e qytetit të Pejës, po vlerësohet se po përfundohet në mënyrë jo të duhur.
Është opozita në këtë komunë ajo që e jep këtë vlerësim, se për shkak të afrimit të zgjedhjeve lokale, punët po bëhen shkel e shko.
“Pastaj janë ndërprerë punimet pas inaugurimit të përfundimit të punimeve në gjysën e sheshit dhe tani po në këtë vit, vitin 2025 kanë filluar punimet tjera për t’a vazhduar pjesën tjetër të sheshit. Pra gjitha këto punime po bëhen për fushatë zgjedhore sepse po shkohet me këtë formulën 3 vjet pusho dhe një vit puno”, thotë Berat Ganiqi – shef i asamblesitëve të VV-së në këtë komunë.
Asamblisti opozitar akuzon edhe kreun e Komunës për neglizhencë të punimeve gjatë mandatit të tij.
“Realisht nëse i shikon rrugët e Pejës nuk ngjasojnë në rrugë të një qyteti për shkak se Peja ka mbetur shumë prapa sa i përket aspektit infrastrukturor, jemi në një qytet tepër të madh ku po ashtu i mungojnë infrastruktura por i mungojnë edhe mjetet në komunikacion siç janë semaforët dhe po ashtu kemi edhe probleme tjera në komunikacion që janë krijuar së fundmi me krijimin e një rrethrrotullimi në qendër të qytetit”, thotë ai.
Mirëpo nga niveli lokal kanë një shpjegim për vonesat në këto punime.
“Ne si Komunë jemi kujdes që së pari tenderimin vetëm me furnizim të materialeve që materialet të jenë dmth sa më cilësore dhe të kontraktohen nga kompani profesionale, dmth sheshi i Pejës është i ndërtuar me gurë natyralë dhe që është profid dhe gur vullkanik dhe është një ndër materialet më të forta dhe më të qëndrueshme. Kështu që ne këtë vit kemi vazhduar me punët pasi që në shesh kanë pas të ndërtohen disa objekte private e dijmë se janë rrëzu objektet e vjetra janë rrënu të gjitha dhe janë liru disa hapësira”, shprehet Agron Nikçi – drejtor i Shërmbimeve Publike.
Drejtori komunal shton se në këtë ka ndikuar edhe bllokimi i mjeteve buxhetore.
“Gjatë ekzekutimit të punëve në këtë shesh kemi pasur disa herë edhe dëmtim të buxhetit nga përmbaruesi për shkak të shujtave dhe këtyre kontratave kolektive ku në dy ose tri raste mjetet janë marrë pikërisht nga mjetet e sheshit që i kemi pasë ne për t’i paguar kontraktorët tanë”,tregon Nikçi.
Sipas nivelit lokal, ata janë brenda afatit kohor dhe se pas gushtit punimet do të intensifikohen.
