Lidhja e Bizneseve të Kosovës (LBK) ka reaguar ashpër ndaj veprimeve të Zyrës së Rregullatorit për Energji (ZRrE) dhe Qeverisë në detyrë, të cilat lidhen me procesin e liberalizimit të tregut të energjisë elektrike. Përmes një reagimi publik, LBK ka ngritur alarmin për, siç thuhet, rrezikun serioz që i kanoset ekonomisë së vendit.
Sipas LBK-së, veprimet e ndërmarra nga ZRrE dhe Qeveria, të cilat po imponojnë kalimin e detyruar të bizneseve në tregun e lirë të energjisë, janë bërë “pa transparencë, pa bazë ligjore dhe në kundërshtim me vendimet e gjykatave”. Kjo qasje, sipas tyre, jo vetëm që shkel ligjin dhe Kushtetutën e vendit, por edhe dëmton rëndë sektorin prodhues.
Në reagimin e LBK-së thuhet:
“Lidhja e Bizneseve të Kosovës (LBK) ngre alarmin për rrezikun serioz që i kanoset ekonomisë së vendit nga veprimet e ZRrE-së dhe Qeverisë në detyrë, të cilat po imponojnë kalimin e detyruar në tregun e lirë të energjisë pa transparencë, pa bazë ligjore dhe në kundërshtim me vendimet e gjykatave. Këto vendime: shkelin ligjin dhe Kushtetutën, dëmtojnë sektorin prodhues, rritin rrezikun e falimentimeve masive dhe humbjes së vendeve të punës, kërcënojnë stabilitetin financiar të Kosovës”.
LBK ka kërkuar pezullimin e menjëhershëm të vendimit për daljen e detyruar në tregun e lirë të energjisë, duke apeluar për një veprim të ligjshëm dhe të përgjegjshëm nga ana e institucioneve të vendit. Po ashtu, kanë kërkuar një dialog serioz me sektorin privat, për të arritur një zgjidhje të drejtë dhe të qëndrueshme.
“Ekonomia është baza e shtetit – dhe pa ekonomi funksionale, nuk ka as shtet funksional”, përfundon reagimi i Lidhjes së Bizneseve të Kosovës.
