Eksperti i sigurisë, Hysen Gecaj, ka komentuar praninë e Forcës së Sigurisë së Kosovës (FSK) në operacionin për kërkimin e trupit të pajetë të një 33-vjeçari në Liqenin e Ujmanit, gjatë paraqitjes së tij në emisionin “Këndi i Debatit” në Tëvë1. Ai kritikoi mënyrën se si u trajtua ky operacion, sidomos nga disa aktorë politikë dhe media, duke thënë se vëmendja u zhvendos nga tragjedia te debati mbi FSK-në.
“Kjo varet prej kujt edhe si është parë, por nëse flasim për trajtimin e përgjithshëm edhe në media gjatë gjithë kësaj dite, mund të them se kjo temë, për fat të keq, në vend që të ndihemi si popull dhe si komb të pikëlluar për këtë tragjedi, më shumë ka marrë vëmendjen fakti i pjesëmarrjes së FSK-së në këtë operacion,” u shpreh Gecaj.
Ai theksoi se FSK-ja ka qenë në misionin e saj ligjor dhe profesional për kërkim-shpëtim, por, sipas tij, tema është trajtuar me tone politike, duke e quajtur të papërshtatshme përdorimin e termit “zbarkim”.
“Sot gjatë ditës kemi parë shumë deklarime të ndryshme, ku në një mënyrë është pushtuar vëmendja nga FSK-ja në veri – pjesëmarrje e cila ishte për një operacion humanitar. Përdorimi i fjalës ‘zbarkim’ është bërë pa vend, sepse ajo përdoret në rrethana lufte, në territore të armikut, dhe jo për raste si ky i kërkimit e shpëtimit,” shtoi ai.
Gecaj po ashtu vuri në dukje se mënyra se si u trajtua ky rast ka lënë një impresion negativ edhe te faktori ndërkombëtar, përfshirë ambasadat që kanë reaguar publikisht.
“Me këtë kemi dhënë një shembull të keq edhe para faktorit ndërkombëtar, ku kemi rënë në një nivel ku ambasadat na tregojnë se si të veprojmë. Është më se e qartë që ka pasur edhe përdorim politik, sepse është tërhequr totalisht vëmendja kryesore ndaj FSK-së, duke e paraqitur si një ‘zbarkim’, në vend të një ndihme për një tragjedi të rëndë,” theksoi ai.
Sipas Gecajt, ky rast duhet të kishte bashkuar të gjithë në ndjeshmëri dhe solidaritet, dhe jo të ishte shfrytëzuar për interpretime politike, që sipas tij e dëmtojnë besimin institucional dhe ndërkombëtar ndaj veprimeve legjitime dhe profesionale të FSK-së.
