Mbështetjen e autoriteteve civile, e kanë në mandat.
Kështu, pas kërkesës së Agjencisë për Menaxhimin e Emergjencave dhe pas autorizimit të KFOR-it, Forca e Sigurisë së Kosovës, mëngjesin e së martës filloi asistimin në një operacion të kërkim shpëtimit në veri të vendit.
Gjithë kjo, vlerësohet si përmbushje e detyrave.
“Atje ka shku një njësit i Batalionit të Xhenios, që udhëhiqet me kërkim shpëtim dhe është në kuadër të një operacioni të kërkim shpëtimit, që është në kuadër të operacioneve civile. Do të thotë kjo nuk është ndonjë mision luftarak apo të ndonjë formë tjetër. Por, është një rutinë, normale”, ka thënë Kajtazi.
Angazhimi i njësiteve të FSK-së në këtë operacion të kërkim shpëtimit, nga ish komandanti i FSK-së, Rrahman Rama, konsiderohet si diçka krejt e zakonshme.
“Kjo është e zakonshme dhe patjetër që FSK-ja është në shërbim të qytetarëve, është obligim ligjor dhe moral”, ka thënë Rama.
Mirëpo, çdo tendencë për ta politizuar këtë operacion të FSK-së në Ujman, vlerësohet si e papranueshme.
“Nuk duhet shumë politizuar e me ngrit tonet sidomos në debatet e njerëzve që nuk janë shumë kompetentë të flasin për këtë lëmi edhe të përhapin çështje të cilat nuk janë fare të fushës. Por, realiteti është që ky është njëri prej misioneve të FSK-së, si forcë e armatosur dhe çdoherë duhet respektuar atë që është zotuar në vitin 2013, që në një formë është kufizuar pjesëmarrja, por çdoherë me pëlqim të KFOR-it, si autoritet superior për sigurinë në vend”, është shprehur Ibishi.
Përkundër që angazhimi i sotëm është i pari prej kur FSK-ja u shndërrua në ushtri, Forca është angazhuar edhe në të kaluarën në kuadër të mandatit humanitar.
Kjo kishte ndodhur në vitet 2014 dhe 2016.
