Është gjetur trupi i pajetë i 33-vjeçarit, i cili ishte raportuar si i zhdukur që nga data 27 korrik 2025, në Liqenin e Ujmanit, në veri të vendit.
Gjetjen e tij e ka komfirmuar e FSK-ja përmes një postimi në rrjetin social Facebook, dyshohet se i ndjeri kishte kërcyer nga ura dhe nuk kishte dalë më nga uji. Menjëherë pas raportimit të rastit, Forca e Sigurisë së Kosovës, në bashkëpunim me Agjencinë për Menaxhim të Emergjencave (AME), Policinë e Kosovës dhe me mbështetjen e KFOR-it, nisi operacionin e kërkim-shpëtimit.
Me urdhër të Komandantit të FSK-së, Gjenerallejtënant Bashkim Jashari, ekipet e specializuara për kërkim-shpëtim në ujëra u angazhuan në këtë operacion humanitar. Ata morën të gjitha masat e nevojshme dhe u koordinuan ngushtë me institucionet vendore dhe partnerët ndërkombëtarë për realizimin e kërkimit.
Pas një kërkimi intensiv disa orësh dhe falë përkushtimit e profesionalizmit të ekipeve në terren, trupi i pajetë është gjetur në zonën e liqenit të Ujmanit. Menjëherë pas evakuimit nga uji, trupi i viktimës iu dorëzua Policisë së Kosovës dhe ekipit të forenzikës për procedurat e mëtejme ligjore.
Ky rast ka rikthyer në vëmendje rëndësinë e bashkëpunimit ndërinstitucional dhe përkushtimin e strukturave të sigurisë në situata emergjente.
