Franca i ka bërë thirrje të hënën Bashkimit Evropian që të ushtrojë presion mbi Izraelin që të bjerë dakord për një zgjidhje me dy shtete me palestinezët, disa ditë pasi u zotuan se do ta njohin Palestinën si shtet.
Ministri i Jashtëm francez, Jean-Noël Barrot, u tha gazetarëve në Kombet e Bashkuara se, ndërsa ekziston konsensus ndërkombëtar se koha për një zgjidhje politike të konfliktit izraelito-palestinez është tani, fuqitë botërore duhet t’i mbështesin fjalët e tyre me vepra, raporton AP.
“Komisioni Evropian, në emër të BE-së, duhet të shprehë pritjet e tij dhe të tregojë mjetet me të cilat mund ta nxisim qeverinë izraelite që ta dëgjojë këtë apel”, tha ai.
Barrot foli në ditën e parë të një takimi të nivelit të lartë të OKB-së mbi një zgjidhje dy-shtetërore për konfliktin izraelito-palestinez, i cili po bashkëkryesohet nga Franca dhe Arabia Saudite.
Konferenca , e cila u shty nga qershori dhe u ul në nivel ministror, po zhvillohet në Nju Jork, ndërsa dënimi ndërkombëtar ndaj Izraelit për shkaktimin e një krize të tmerrshme humanitare arrin kulmin.
Si Izraeli ashtu edhe aleati i tij më i ngushtë, Shtetet e Bashkuara, refuzuan të merrnin pjesë në takim, në të cilin Barrot tha se po marrin pjesë përfaqësues të 125 vendeve, përfshirë 50 ministra./teve1/
