Policia e Kosovës në pikën kufitare në Vërmicë ka hasur në një veturë të dyshuar, ku më pas ka rezultuar si veturë e vjedhur jashtë vendit.
“Me datë 29.05.2022 rreth orës 22:00 në pikën kufitare në Vërmicë, konkretisht në drejtimin e qarkullimit nga Shqipëria në hyrje për në Kosovë, është ndaluar vetura e tipit Land Rover, LW, ngjyrë e zezë me targa vendore, me drejtues mashkull kosovar”, thuhet në njoftim.
Policia ka bërë të ditur se gjatë kontrollës ka dyshuar se ka ndërhyrje tek numri identifikues i veturës, raporton teve1.info
“Gjatë verifikimit të të dhënave të veturës dhe regjistrimit të saj në sistem, vetura e lartcekur është selektuar për kontroll në vijën e dytë, ku gjatë realizimit të kontrollës tek numri identifikues i veturës, është dyshuar se ka ndërhyrje. Me këtë rast është kërkuar nga Policia e Frontex- it, me mision në pikën kufitare në Vërmicë, që të bëhet verifikimi i veturës, verifikim sipas të cilit ka rezultuar se, e njëjta veturë është e vjedhur në vitin 2016 në një shtet tjetër”, thuhet në njoftim.
Për këtë rast është njoftuar edhe prokurori i shtetit i cili ka urdhëruar që vetura dhe leja e qarkullimit të sekuestrohen dhe rasti të vazhdoj në procedurë të rregullt ndërsa lënda per hetime të metutjeshme i është dorëzuar njësisë për hetimin e auto krimeve.
