Zëdhënësi i Lëvizjes Vetëvendosje, Arlind Manxhuka, ka komentuar para tentativës së 54-t për konstituimin e Kuvendit, duke theksuar se disa parti opozitare ende nuk po arrijnë të dalin nga koalicioni i gjatë 20-vjeçar dhe po përpiqen ta kthejnë vendin në periudhën para zgjedhjeve të 14 shkurtit 2021.
Në një postim në rrjetet sociale, Manxhuka tha se LVV-së dhe kryeministrit në detyrë, Albin Kurti, u duhen votat për qeverisje, por jo me çdo kusht dhe jo nga aktorë politikë që synojnë rikthimin në kohët e kaluara.
“Nyja politike apo sharra në gozhdë sot është te pikëprerja para dhe pas 14 shkurtit 2021. Një krah që do me u kthy para asaj dhe një që do të vazhdojë përpara me reforma. Lëvizjes VETËVENDOSJE! e Albin Kurtit i duhen votat, por jo me çdo kusht dhe jo nga e me bindjen e ndokujt që i duket se ‘i erdhi dita’.”
Manxhuka po ashtu nënvizoi se Vetëvendosja është fituese absolute e zgjedhjeve dhe ka bërë ftesë për koalicion disa subjekteve parlamentare opozitare, por ato nuk kanë arritur të shkëputen nga “koalicioni i 20-vjeçarit”.
“Siç duket ata nuk mund të shkëputen nga koalicioni i 20 vjeçarit, prandaj edhe kërkojnë rikthimin para 14 shkurtit 2021.”
Ai përfundoi duke thënë se qytetarët e Kosovës kanë votuar Vetëvendosjen për të ndëshkuar periudhën e kaluar qeverisëse, dhe LVV nuk dëshiron të kthehet në ato praktika.
“Ne as nuk duhet, as nuk duam të bëhemi si ai 20-vjeçar, sepse Republika e Kosovës nuk do të kthehet atje ku ishte.”
Deklarata e Manxhukës vjen në prag të një seance vendimtare për konstituimin e Kuvendit, ku pritjet për një marrëveshje politike mbeten të ulëta.
