Deputeti i Lëvizjes Vetëvendosje, Arbër Rexhaj, ka folur për media para seancës së fundit për konstituimin e Kuvendit të Kosovës, që pritet të mbahet para përfundimit të afatit kushtetues.
Rexhaj deklaroi se si deputetë të VV-së janë të gatshëm për të votuar dhe për të kryer detyrën që ua ka besuar qytetari i Republikës së Kosovës.
“Ne kemi ardhur këtu me votu, detyrën tonë si deputetë me e ushtru, atë që na ka dhënë qytetari i Republikës. Nëse më pyesni se a ka ndonjë të re, jemi në mbledhje të grupit parlamentar dhe do ta diskutojmë,” tha Rexhaj.
Ai ka kritikuar edhe njëherë opozitën, duke i akuzuar për tentim të qëllimshëm për të bllokuar Kuvendin që nga fillimi i procesit.
“Në thelb prej fillimi ka ekzistuar ideja e opozitës që ta bllokojë Kuvendin. Ju e mbani mend kur ata patën refuzuar të votojnë edhe mandatet e veta”, theksoi ai.
Seanca e sontme konsiderohet si përpjekja e fundit për konstituimin e Kuvendit para ndërhyrjes së Gjykatës Kushtetuese.
