Ministria e Punëve të Jashtme dhe Diasporës (MPJD) e Republikës së Kosovës ka konfirmuar se Gjykata e Lartë e Beogradit, konkretisht Departamenti për Krime të Luftës, ka caktuar masën e paraburgimit prej 30 ditësh ndaj shtetasit kosovar, Lulzim Halili, i arrestuar nga autoritetet serbe më 22 korrik 2025.
Sipas MPJD-së, Halili ngarkohet me akuza për “organizimin dhe nxitjen e kryerjes së krimeve të luftës dhe gjenocidit”, bazuar në Nenin 145, paragrafi 2, të Kodit Penal të ish-Republikës Federale të Jugosllavisë.
“Duke qenë se tashmë është konfirmuar se ndaj Halilit është iniciuar procedurë penale, Zyra Ndërlidhëse e Republikës së Kosovës në Serbi do të paraqesë menjëherë kërkesë zyrtare pranë Gjykatës së Lartë të Beogradit për ta vizituar atë në Qendrën e Paraburgimit ku po mbahet”, thuhet në njoftimin zyrtar.
MPJD ka theksuar se do të vazhdojë të ndjekë nga afër rastin dhe do të informojë opinionin publik për çdo zhvillim të ri në lidhje me këtë çështje.
Arrestimi i Halilit vjen në kohën e shtimit të tensioneve mes Kosovës dhe Serbisë. Vetëm disa ditë më parë, më 18 korrik, autoritetet në Kosovë arrestuan Igor Popoviqin – ndihmësdrejtor në Zyrën për Kosovën në Qeverinë serbe – për nxitje të përçarjes dhe mosdurimit, pasi në një fjalim publik e kishte cilësuar Ushtrinë Çlirimtare të Kosovës si “organizatë terroriste”.
Në vitet e fundit, Serbia ka arrestuar disa qytetarë të Kosovës nën dyshimet për krime lufte, çka është kritikuar nga institucionet kosovare si veprim i motivuar politikisht.
