Në vitin 2018 kishin dhënë në shfrytëzim disa parcela të Komunës së Gjakovës.
E të mërkurën, katër zyrtarë komunalë janë arrestuar nën dyshimin se në këtë rast, keqpërdorën detyrën zyrtare.
Prokuroria Themelore e Gjakovës tashmë ka bërë kërkesë për caktimin e masës së paraburgimit ndaj A.B., E.B., A.L., dhe A.K.
Në kërkesë, tregohet për veprimet që dyshohet se të pandehurit A.B., dhe E.B., i kanë ndërmarrë në atë vit.
“Më datë 10.10.2018 kanë lëshuar dhe nënshkruar pëlqimin në interes të palës A.L., për parcelimin e pjesshëm fizik të parcelave nr…. në pronësi shoqërore Rrugë publike, nr….. në pronësi të Kuvendit Komunal në e Gjakovë dhe nr…. në pronësi të K. të B. I. në e Gjakovë (V.) edhe pse të pandehurit kanë qenë në dijeni lidhur me pronarët juridik të këtyre palujtshmërive pasi në dosjen e lëndës kanë pasur certifikatat pronësore të datës 24.09.2018, dhe nga ky veprim pala A.L., arrin te krijoj parcelat e reja dhe te njëjtat i bart ne emër të vetin, me çrast me veprimet e tyre kanë cenuar dhe dëmtuar pasurin e Kuvendit Komunal në e Gjakovë, si dhe të K. të B., I., në e Gjakovë”, thuhet nga Prokuroria.
Në dosje përmenden edhe dhënia e disa parcelave të tjera nga po këta zyrtarë.
“Më datë 25.10.2019 kanë lëshuar dhe nënshkruar pëlqimin në interes të palëve M.Ll., dhe Sh.B., për parcelimin e pjesshëm fizik të parcelave nr…… dhe ….. në pronësi të K. të B. I., në e Gjakovë (V….) edhe pse të pandehurit kanë qenë në dijeni lidhur me pronarin juridik të kësaj palujtshmërie pasi në dosjen e lëndës kanë pasur certifikatën pronësore”, thuhet në komunikatë.
Kurse drejtoresha për Kadastër, Gjeodezi dhe Pronë dhe juristi me dashje dyshohet se kanë nxjerrë vendime të kundërligjshme.
Këto vendime, mundësuan bartjen e pronave komunale tek personat fizik, duke e dëmtuar kështu pasurinë e Komunës së Gjakovës.
Gjithë këto arrestime po i shohin si shqetësuese opozita në këtë Komunë.
“Kemi qytetarë dhe sinjalizues dhe qytetarë që na informojnë ne jetojmë në Gjakovë e shohim si po shkojnë zhvillimet në urbanizëm por edhe çështjen e pronave për çfarë po bëhet ky rast. Drejtori aktual i urbanizmit i cili është arrestuar dje e ka edhe një dënim të shkallës së parë për shkelje të detyrës zyrtare por rasti ka shkuar në Gjykatë Themelore ndërsa ky është rasti i dytë për të cilin ai dyshohet dhe është arrestuar”, ka thënë Albin Rudi nga LVV.
Për këtë rast ka reaguar edhe kryetari Ardian Gjini i cili tha se është i bindur në ndershmërinë e kolegëve të arrestuar, derisa gjithë arrestimin u shpreh se e sheh të panevojshëm.
Tëvë1 ka tentuar të marrë një qëndrim nga ai për këtë çështje, por që nuk ka qenë i qasshëm.
