Ministri në detyrë i Mbrojtjes, Ejup Maqedonci, të enjten është takuar me udhëheqësin e Sekretariatit të Industrisë së Mbrojtjes Kombëtare të Turqisë, Haluk Görgün.
Sipas Maqedoncit, gjatë këtij takimi, kanë diskutuar mbi modernizimin e kapaciteteve të Forcës së Sigurisë së Kosovës, si dhe për projektet e prokurimit të zhvilluara me kompanitë turke.
“Në veçanti, shqyrtuam planet për të ardhmen dhe mundësitë e vazhdimit të prokurimit me kompani si Baykar, si dhe shumë të tjera”, ka shkruar ai në Facebook.
Maqedonci, tutje ka theksuar se vizita në Panairin e Industrisë së Mbrojtjes (IDEF) ishte një mundësi e shkëlqyer për të parë nga afër risitë që ofrojnë kompanitë turke të cilat sipas tij, janë thelbësore për përmirësimin e aftësive të ushtrisë së Kosovës.
“Faleminderit për mbështetjen e deritanishme, dhe jam i entuziazmuar për projektet e përbashkëta që na presin në të ardhmen”, ka përfunduar Maqedonci.
